ارى مەن ۇياتىن ىسىرىپ قويىپ، قارا باسى مەن كارابايىر قۇلقىنىنىڭ قۇلىنا اينالعان رەسەيلىك الەكس لەسلي ءبىزدىڭ ەلگە كىرە المايدى. ونىڭ بۇلاي تىپىرشىپ جۇرگەندەگى بار ارەكەتى - ەلدى دۇرلىكتىرىپ، ەشكىم وقىمايتىن كىتابىن ساتۋ عانا. الەكس لەسليدىڭ قازاق توپىراعىنا اياعىن اتتاپ باسا المايتىندى جايلى كاسىپقوي بوكسشى جانقوش تۇراروۆ پىكىر ءبىلدىردى. سپورتشى بۇل تۋراسىندا ءوزىنىڭ ۆيدەو-ۇندەۋىندە جەتكىزدى.
- ەر-نامىستى جىگىتتەرىمىز كوپ. قازاق قىزىنىڭ نامىسىن اياققا تاپتاتىپ، قاراپتان قاراپ وتىرمايمىز. ءار قازاقتىڭ قىزىن قورعايمىز. مىنا الەكستىڭ ىستەپ جۇرگەن تىرلىگى جۇرەكتى اۋىرتادى. ءار قازاقتىڭ جىگىتتەرى نامىسشىل ەكەندىگىن كورسەتىپ جاتىر. اۋەجايمەن حابارلاستىق. ءبىزدىڭ جەرگە ۇشىپ كەلسە دە، دەپورت جاسالادى. ول ءوزىنىڭ كىتابىن ساتۋ ءۇشىن حايپ جاساپ جاتىر. ۆيدەولارىندا الماتىعا ۇشىپ كەلدىم دەدى دە، كىتابىنىڭ سىلتەمەلەرىن قويىپ قويدى. دۇرلىگۋگە نەگىز جوق... قازاقتىڭ جىگىتتەرى جاساي بەرسىن، قىزدارىمىز، نامىستى بولايىق. ءبارى ورنىندا، - دەدى سپورت ساڭلاعى.
View this post on Instagram
الەكس لەسلي ءوزىنىڭ داۋلى بەينەجازباسىندا قازاقستانعا كەلىپ، قازاق قىزدارىن توسەك قاتىناسىنا تارتۋدىڭ ءتۇرلى ءتاسىلىن ۇيرەتەتىنىن اشىق ايتقان ەدى.
ءبىر ايتا كەتەرلىگى، سوڭعى كەزدەرى رەسەيلىكتەردىڭ قازاق ەسەبىنەن اتىن شىعارىپ، ايتاققا ەرۋى - قالىپتى جاعدايعا اينالدى. ولاردىڭ مۇنداي قارابايىر ارەكەتى، كەرىسىنشە، قازاقتىڭ باسىن بىرىكتىرىپ، كۇش الۋىنا، ءتىلىن قۇرمەتتەپ، ءدىلىن ساقتاۋىنا ىقپال ەتىپ جاتىر. رەسەيلىك بەلسەندىلەردىڭ باسىنا قازاقتى قارالاماسا، قازاقتىڭ اراسىنا كەلىپ، كونتسەرت وتكىزبەسە، "كۇنىن دە كورە المايتىن" مۇشكىل كۇن تۋعانداي.
"ادىرنا" ۇلتتىق پورتالى
