31 تامىز بەن 6 قىركۇيەك ارالىعىندا قىرعىزستاندا وتكەن VI دۇنيەجۇزىلىك كوشپەندىلەر ويىندارىندا قازاقستان قۇراماسى 74 مەدال جەڭىپ الدى. بۇل تۋرالى سپورت جانە تۋريزم مينيسترلىگى مالىمدەدى، دەپ حابارلايدى «ادىرنا”.
قازاقستان سپورتشىلارىنىڭ قورجىنىندا 32 التىن، 20 كۇمىس جانە 22 قولا جۇلدە بار. وسى ناتيجەمەن ەلىمىز جالپىكوماندالىق ەسەپتە ءبىرىنشى ورىنعا جايعاستى. ەكىنشى ورىندى 30 التىن مەدال جەڭىپ العان قىرعىزستان قۇراماسى يەلەنسە، جەتى التىن جۇلدەسى بار رەسەي كومانداسى ۇزدىك ۇشتىكتى تۇيىندەدى.
جارىستىڭ العاشقى التىن مەدالدارىن قازاقستان قۇراماسى 2 قىركۇيەكتە اۋدارىسپاقتان جەڭىپ الدى. فينالدا سايلاۋ مۇحاممەدجان قىرعىزستاندىق قارسىلاسىن 2:1 ەسەبىمەن جەڭىپ، چەمپيون اتاندى. بۇل — قازاقستاندىق سپورتشىلاردىڭ بيىلعى ءدۇبىرلى دوداداعى العاشقى التىن جۇلدەلەرى.
سول كۇنى «كوچموندور ءجۇرۇشۇ» حالىقارالىق ات مارافونىنىڭ العاشقى كەزەڭى دە اياقتالدى. جالپى ۇزىندىعى 300 شاقىرىمدى قۇرايتىن جارىستىڭ ءبىرىنشى كۇنىندە قاتىسۋشىلار 50 شاقىرىمدى ەڭسەردى. كەزەڭ قورىتىندىسى بويىنشا قازاقستان قۇراماسى كوش باستادى. ەكىنشى ورىندا قىرعىزستاننىڭ «الا-توو»، ءۇشىنشى ورىندا «ىستىقكول» كوماندالارى ورنالاستى.
ۇلتتىق سپورت تۇرلەرىنەن قازاقستاندىقتار وزگە دە جۇلدەلەرگە قول جەتكىزدى. الىش كۇرەسىنەن 60 كەلىگە دەيىنگى سالماقتا سىنعا تۇسكەن جاندوس ابۋباكىروۆ قولا مەدال جەڭىپ الدى. سونداي-اق تۇرماحانبەت قالمۇحان الىش كۇرەسىنەن جۇلدەگەر اتاندى.
ويىنداردىڭ ءۇشىنشى كۇنىندە سامبوشى بولات ساپار التىن جۇلدەگە يە بولدى. قازاقستان قۇراماسى ارقان تارتۋدان دا چەمپيون اتانىپ، قورجىنعا تاعى ءبىر التىن مەدال قوستى. وسى كۇننىڭ قورىتىندىسى بويىنشا ۇلتتىق قۇراما 12 التىن، 7 كۇمىس جانە 5 قولا مەدال جينادى.
4 قىركۇيەكتە قازاق كۇرەسىنەن 60 كەلى سالماقتا ونەر كورسەتكەن ەرنۇر سۇلەيمەن جەڭىمپاز اتاندى. ال تەڭگە ءىلۋ سايىسىندا قازاقستان اتىنان سىنعا تۇسكەن باقتىباي قانات التىن مەدال يەلەندى.
وسى ناتيجەلەردەن كەيىن VI دۇنيەجۇزىلىك كوشپەندىلەر ويىندارىنىڭ ارالىق قورىتىندىسى بويىنشا قازاقستان قۇراماسى جالپىكوماندالىق ەسەپتە كوش باستادى.
جالپى جارىس قورىتىندىسىندا قازاقستاندىق سپورتشىلار 32 التىن، 20 كۇمىس جانە 22 قولا مەدال جەڭىپ الىپ، جالپىكوماندالىق ەسەپتە ءبىرىنشى ورىنعا شىقتى.
