قازاقستان رەسەيمەن شەكارادا قالىپتاسقان قيىن جاعداي مەن جاڭا كوشى-قون ەرەجەلەرىنە بايلانىستى ەۋرازيالىق ەكونوميكالىق كوميسسياعا (ەەك) رەسمي تۇردە شاعىم ءتۇسىردى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
بۇل تۋرالى 9 قازاندا ۇكىمەتتىڭ ءباسپاسوز قىزمەتى حابارلادى.
بۇل جاعدايدى «سىرتقى ساۋداعا كەدەرگى كەلتىرەتىن بارەر» دەپ تانىتۋدى كوزدەپ وتىر. تمد جيىنى اياسىندا كوتەرىلگەن ماسەلە 13 قازاندا ەەك الاڭىندا، ال 7 قاراشادا وتەتىن قازاقستان مەن رەسەي اراسىنداعى 26-شى ۇكىمەتارالىق كوميسسيانىڭ وتىرىسىندا تالقىلانادى.
رەسەي فەدەراتسياسىنىڭ جاڭا كوشى-قون زاڭناماسىنا ساي، شەتەل ازاماتتارى ەلدە 90 كۇن عانا بولادى.
بۇرىن بۇل مەرزىم 180 كۇنگە سوزىلعان.
بۇل شەكتەۋلەر حالىقارالىق جۇك جانە جولاۋشى تاسىمالداۋشىلارعا دا قاتىستى. بۇعان قوسا، رەسەي مەن بەلارۋس وداقتاس مەملەكەت بولعاندىقتان، ولاردىڭ اۋماقتارىندا بولۋ ۋاقىتى بىردەي ەسەپتەلەدى.
قازاقستاندا مۇنداي شەكتەۋ جارتى جىل ىشىندە 90 كۇن بولىپ بەلگىلەنگەنىمەن، ول حالىقارالىق تاسىمالداۋشىلارعا قولدانىلمايدى. ۇكىمەت بۇل نورمانىڭ حالىقارالىق تاجىريبەگە ساي ەكەنىن اتاپ ءوتتى.
ءماجىلىس دەپۋتاتى بولاتبەك ناجمەتدينۇلىنىڭ ايتۋىنشا، جاڭا ەرەجەلەر تەك حالىقارالىق ەمەس، ەاەو اۋماعىنداعى ىشكى باعىتتاردا جۇمىس ىستەيتىن جۇرگىزۋشىلەرگە دە اسەر ەتكەن. كوپشىلىگىنىڭ رەسەيدە بولۋ مەرزىمى تاۋسىلىپ، رەيسكە قايتا شىعۋ ءۇشىن جاڭا جىلدى كۇتۋگە ءماجبۇر. ال ليميتتەن اسىپ كەتكەندەر ۇستالىپ، ەلدەن شىعۋ تۋرالى ەسكەرتۋ العان.
ۇكىمەتتىڭ حابارلاۋىنشا، جاعدايدى ودان ءارى قيىنداتقان رەسەي تاراپى قىركۇيەكتەن بەرى جۇرگىزىپ كەلە جاتقان «سۇر يمپورتقا» قارسى رەيدتەرى بولىپ وتىر. وسىعان بايلانىستى كەي وتكىزۋ پۋنكتتەرىندە جۇك كولىكتەرىن تەكسەرۋ ۋاقىتى ۇزارعان.
قىركۇيەك ايىنان بەرى قازاقستان مەن رەسەي شەكاراسىندا جۇك كولىكتەرىنىڭ كەزەگى ۇزىن-سونار.
«بۇل شارالار ساپاسىز، تۇتىنۋشى ءومىرى مەن دەنساۋلىعىنا قاۋىپتى تاۋارلاردىڭ زاڭسىز اينالىمىنا توسقاۋىل قويۋعا باعىتتالعان»، – دەلىنگەن رەسەي حابارلاماسىندا.
