قازاقستاندىقتاردىڭ باسىم بولىگى قورعانىس مينيسترلىگىنىڭ اشىقتىعى مەن ەسەپتىلىگىن ارتتىرۋدى اسكەردەگى باستى وزگەرىستەردىڭ ءبىرى دەپ سانايدى، دەپ حابارلايدى "ادىرنا".
بۇل تۋرالى 28–29 قىركۇيەكتە جۇرگىزىلگەن ساۋالناما ناتيجەسىندە بەلگىلى بولدى.
زەرتتەۋدى «دەموكراتيا ينستيتۋتى» عىلىمي-زەرتتەۋ قاۋىمداستىعى جۇرگىزگەن. ساۋالناماعا 18 جاستان اسقان 1012 ادام قاتىسقان. زەرتتەۋ CAWI ادىسىمەن، ياعني ونلاين ساۋالناما ارقىلى وتكىزىلگەن. وعان قازاقستاننىڭ 17 وبلىسى جانە استانا، الماتى، شىمكەنت قالالارىنىڭ تۇرعىندارى قامتىلعان.
ساۋالناماعا قاتىسۋشىلارعا اسكەردە قانداي وزگەرىستەر قاجەت دەگەن سۇراق قويىلىپ، بىرنەشە جاۋاپتى تاڭداۋعا مۇمكىندىك بەرىلگەن.
ناتيجەسىندە:
* قورعانىس مينيسترلىگىنىڭ اشىقتىعى مەن ەسەپتىلىگىن ارتتىرۋ – 47,4%;
* كوماندالىق قۇرامدى جاڭارتىپ، كاسىبي دەڭگەيىن كوتەرۋ – 34,3%;
* قورعانىس سالاسىنداعى جەمقورلىقپەن كۇرەستى كۇشەيتۋ – 29,4%;
* اسكەري قىزمەتشىلەردىڭ قاۋىپسىزدىگى مەن الەۋمەتتىك جاعدايىن جاقسارتۋ – 25,3%;
* قارۋ-جاراق پەن اسكەري تەحنيكانى جاڭارتۋ – 20,7%;
* جاڭا تەحنولوگيالار مەن تسيفرلىق شەشىمدەردى ەنگىزۋ – 20,4%;
* جاۋىنگەرلىك دايارلىق پەن وقۋ-جاتتىعۋ ساپاسىن ارتتىرۋ – 19,2%.
سونىمەن قاتار ساۋالناماعا قاتىسۋشىلاردىڭ 85,2%-ى پرەزيدەنت قاسىم-جومارت توقاەۆتىڭ قورعانىس مينيسترلىگىن جان-جاقتى تەكسەرۋ تۋرالى شەشىمىن تولىق نەمەسە ءىشىنارا قولداعان. ال ارميانى رەفورمالاۋ تۋرالى شەشىمدى 85,7%-ى قولداعان.
