جاقىندا الەۋمەتتىك جەلىلەردە جاساندى ينتەللەكت (جي) تۋرالى زاڭ جوباسى تالقىعا ءتۇستى. كوپشىلىك اراسىندا ونىڭ مۇمكىندىكتەرى مەن قاۋپى جونىندە ءارتۇرلى پىكىرلەر ايتىلۋدا. وسىعان بايلانىستى بەلگىلى قوعام بەلسەندىسى مەيىرجان اۋەلحانۇلى وز كوزقاراسىن ءبىلدىرىپ، جي-ءدى تەجەۋ ەمەس، كەرىسىنشە، ونى ءتيىمدى پايدالانۋ ماڭىزدى ەكەنىن اتاپ ءوتتى، دەپ حابارلايدى "ادىرنا" ۇلتتىق پورتالى.
ونىڭ پىكىرىنشە، قازاقستان جي-ءدى قولدانۋ مۇمكىندىگىن جىبەرىپ السا، تەحنولوگيالىق دامۋ جاعىنان الەمنەن قالىپ قويۋى مۇمكىن. مەيىرجان اۋەلحانۇلى كەيبىر دەپۋتاتتاردىڭ “جي قازاقستاننىڭ ماسەلەلەرىن ءبىلىپ، بىزدەن وزىپ كەتەدى” دەگەن پىكىرىن سىنعا الدى.
“جي – جاۋ ەمەس، ول قازىردىڭ وزىندە بۇكىل الەم مويىنداعان، يگىلىك پەن دامۋدىڭ قۋاتتى قۇرالى. دامىعان ەلدەر ونى مەديتسينادا، ءبىلىم بەرۋدە، وندىرىستە، ءتىپتى مەملەكەتتىك باسقارۋدا كەڭىنەن قولدانىپ جاتىر. قازاقستان ءۇشىن ەڭ ماڭىزدىسى – بۇل تەحنولوگيانى قالاي ءتيىمدى ءارى قاۋىپسىز پايدالانۋ كەرەكتىگىن انىقتاۋ بولۋى ءتيىس”، – دەپ جازدى ول.
مەيىرجان اۋەلحانۇلىنىڭ ايتۋىنشا، قازاقستاندا جي زەرتتەۋ ورتالىقتارىن اشۋ، وسى سالاداعى مامانداردى دايارلاۋ، ستارتاپتار مەن كاسىپكەرلەرگە قولداۋ كورسەتۋ ماڭىزدى. ونىڭ ويىنشا، جي-گە زاڭمەن تىيىم سالۋ نەمەسە ونى شەكتەۋ – قاتە شەشىم، ويتكەنى تەحنولوگيا دامۋىن تەجەسەك، ەلىمىزدىڭ بولاشاقتاعى باسەكەگە قابىلەتتىلىگىنە قاۋىپ تونەدى.
قازىرگى ۋاقىتتا اقش، قىتاي، جاپونيا، سينگاپۋر سياقتى مەملەكەتتەر جي-ءدى ۇلتتىق ستراتەگياسىنىڭ اجىراماس بولىگى رەتىندە قاراستىرىپ، بۇل سالاعا ۇلكەن ينۆەستيتسيا قۇيىپ جاتىر. قازاقستان دا وسى باعىتتا ناقتى قادامدار جاساۋى كەرەك.
قازىر قازاقستاندا جي تۋرالى زاڭ جوباسى ازىرلەنىپ جاتىر. مەيىرجان اۋەلحانۇلى زاڭ جوباسىنىڭ جۇمىس توبىنا كىرەتىنىن جانە وسى ماسەلەگە قاتىستى ۇسىنىستاردى جەتكىزۋگە دايىن ەكەنىن ايتتى.
“جي-ءدى قولدانۋدان قورىقپاي، ونى تەرەڭ ءتۇسىنىپ، كۇندەلىكتى ومىرگە بەيىمدەسەك، قازاقستان جاڭا تەحنولوگيالىق داۋىردە ءوز ورنىن تابادى”، – دەپ قورىتىندىلادى ول.
