الماتى وبلىسىنىڭ اكىمى لاۋازىمىنا توتەنشە جاعدايلار مينيسترلىگىنىڭ بۇرىنعى باسشىسى شىڭعىس ارىنوۆپەن بىرگە تاعى ءبىر كانديداتتىڭ ۇسىنىلعانى بەلگىلى بولدى. ۇكىمەتتىڭ رەسمي سايتىندا حابارلانعانداي، مەملەكەت باسشىسىنىڭ ارنايى تاپسىرماسىمەن پرەمەر-مينيستر ولجاس بەكتەنوۆ جانە پرەزيدەنت اكىمشىلىگىنىڭ باسشىسى رومان سكليار الماتى وبلىسى ءماسليحاتتارى دەپۋتاتتارىنىڭ وتىرىسىنا قاتىستى.
رومان سكليار دەپۋتاتتارعا پرەزيدەنت قاسىم-جومارت توقاەۆتىڭ الماتى وبلىسىنىڭ اكىمى لاۋازىمىنا ەكى كانديداتتى ۇسىنۋ تۋرالى حاتىن وقىپ بەردى. ولار – بۇرىنعى توتەنشە جاعدايلار ءمينيسترى شىڭعىس ءارىنوۆ جانە الماتى وبلىسى اكىمىنىڭ ورىنباسارى عاني مايلىباەۆ.
جيىنعا 178 دەپۋتات قاتىستى. اشىق داۋىس بەرۋ قورىتىندىسى بويىنشا شىڭعىس ءارىنوۆتىڭ كانديداتۋراسىن دەپۋتاتتاردىڭ 83 پايىزى قولدادى.
قازاقستان پرەزيدەنتىنىڭ ءتيىستى جارلىعىمەن شىڭعىس ءارىنوۆ الماتى وبلىسىنىڭ اكىمى بولىپ تاعايىندالدى.
وبلىس اكتيۆىمەن وتكەن جيىندا پرەمەر-مينيستر ولجاس بەكتەنوۆ ءوڭىردىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن وبلىستىڭ بۇرىنعى اكىمى مارات سۇلتانعازيەۆكە العىس ءبىلدىردى. كەيىن ۇكىمەت باسشىسى وبلىس اكتيۆىنە الماتى وبلىسىنىڭ جاڭا اكىمى شىڭعىس ءارىنوۆتى تانىستىردى.
ەسكە سالايىق، 4 قىركۇيەكتە الماتى وبلىسىنىڭ جاڭا اكىمىن تاعايىنداۋ ءۇشىن ءماسليحات دەپۋتاتتارىنىڭ جينالاتىنى بەلگىلى بولعان ەدى.
بۇگىن قازاقستان پرەزيدەنتى مارات سۇلتانعازيەۆتى وبلىس اكىمى قىزمەتىنەن بوساتتى. ونىڭ ورنىنا شىڭعىس ءارىنوۆ تاعايىندالدى.
