تۇركيا پرەزيدەنتى رەجەپ تايىپ ەردوعان ىستامبۇلدا 1,7 ميلليون ادام قاتىسقان رەكوردتىق شەرۋ جينادى، دەپ حابارلايدى "ادىرنا" پورتالى Anadolu باسىلىمىنا سىلتەمە جاساپ.
ميتينگ بۇرىنعى اتاتۇرىك حالىقارالىق اۋەجايىنىڭ اۋماعىندا ورنالاسقان ۇلتتىق ساياباقتا ءوتتى. شارانى بيلىكتەگى ادىلەت جانە دامۋ پارتياسى ۇيىمداستىردى.
"ماعان جەتكەن رەسمي مالىمەت بويىنشا، شەرۋگە 1,7 ميلليونعا جۋىق ادام قاتىسۋدا. ىستامبۇل تۇرعىندارى سايلاۋعا ء"يا" دەسە، پرەزيدەنتتى سايلاۋ ماسەلەسى شەشىلدى دەپ ساناۋعا بولادى", - دەدى ەردوعان سويلەگەن سوزىندە.
سونىمەن قاتار، DW اگەنتتىگىنىڭ حابارلاۋىنشا، 7 مامىردا تۇركيانىڭ ەرزۋرۋم قالاسىندا وپپوزيتسيا شەرۋىنە بەلگىسىز بىرەۋلەردىڭ شابۋىلى سالدارىنان كەم دەگەندە 9 ادام جاراقات العان. جيىندا ءسوز العان ىستامبۇل مەرى ەكرەم يماموگلۋ وپپوزيتسيا مەن ميتينگىگە قاتىسۋشىلارعا تاس لاقتىرىلعانىن، ناتيجەسىندە پارتيا اۆتوبۋسىنىڭ زاقىمدانعانىن ايتتى. ەكرەم يماموگلۋ وپپوزيتسيالىق «حالىق اليانسى» اتىنان ءبىر كانديدات – رەسپۋبليكالىق حالىق پارتياسىنىڭ جەتەكشىسى كەمال كىلىچداروعلۋدى ۇسىنعان.
تۇركيادا پرەزيدەنتتىك جانە پارلامەنتتىك سايلاۋ 14 مامىردا وتەدى. ەردوعاننىڭ باستى باسەكەلەسى وپپوزيتسيالىق «حالىق اليانسى» پارتياسىنىڭ بىرىڭعاي كانديداتى كەمال كىلىچداروگلۋ بولماق. سايلاۋعا «مەملەكەت» پارتياسىنىڭ باسشىسى مۋحاررەم ينجە مەن «اتا» اليانسىنىڭ كانديداتى سينان وگان دا قاتىسۋدا.
"ادىرنا" ۇلتتىق پورتالى
