قاسىم-جومارت توقاەۆ كەزەكتەن تىس ءوتىپ جاتقان پرەزيدەنت سايلاۋىندا داۋىس بەردى، دەپ حابارلايدى ”ادىرنا” ءتىلشىسى.
مەملەكەت باسشىسى ەلورداداعى ءال-فارابي اتىنداعى وقۋشىلار سارايىندا ورنالاسقان سايلاۋ ۋچاسكەسىنە بارىپ، كەزەكتەن تىس ءوتىپ جاتقان پرەزيدەنت سايلاۋىندا داۋىس بەردى.
جۋرناليستەر الدىندا ءسوز سويلەگەن قاسىم-جومارت توقاەۆ پرەزيدەنت سايلاۋى ەلىمىز ءۇشىن تاريحي كۇن ەكەنىن اتاپ ءوتتى.
– بۇگىن – وتە ماڭىزدى، تاريحي كۇن. ەلىمىزدىڭ جارقىن بولاشاعى ءۇشىن داۋىس بەرىپ وتىرمىز. شىن مانىندە، بيىل وڭاي بولعان جوق. بىراق حالقىمىز جۇمىلىپ، قيىندىقتاردىڭ ءبارىن ەڭسەردى. ەندى الدىمىزدا تۇرعان وتە اۋقىمدى مىندەتتەر، ماقساتتار بار. اتقاراتىن جۇمىس ءالى دە كوپ. ساياسي رەفورمالار جۇزەگە اسىرىلىپ جاتىر. جازدا جالپىۇلتتىق رەفەرەندۋم ءوتتى. ەندى، مىنە كەزەكتەن تىس پرەزيدەنت سايلاۋى وتكىزىلىپ جاتىر. كەلەشەكتە بۇل جۇمىستار جالعاسا بەرەدى، – دەدى قاسىم-جومارت توقاەۆ.
مەملەكەت باسشىسى ءسوزىن قورىتىندىلاي كەلە وتاندىق جانە شەتەلدىك بۇقارالىق اقپارات قۇرالدارى وكىلدەرىنىڭ سۇراقتارىنا جاۋاپ بەردى.
