پرەزيدەنت الماتى وبلىسىنىڭ اكىمىن قىزمەتىنەن بوساتتى

بۇگىن، 6 قىركۇيەكتە قازاقستان پرەزيدەنتى قاسىم-جومارت توقاەۆ مارات سۇلتانعازيەۆتى الماتى وبلىسىنىڭ اكىمى قىزمەتىنەن بوساتتى، دەپ حابارلايدى “ادىرنا”.

"مەملەكەت باسشىسىنىڭ جارلىعىمەن مارات ەلەۋسىزۇلى سۇلتانعازيەۆ الماتى وبلىسىنىڭ اكىمى لاۋازىمىنان بوساتىلدى", – دەپ جازىلعان رەسمي اقپاراتتا.

ءوڭىر اكىمىنىڭ اۋىسۋى مۇمكىن ەكەنى 3 قىركۇيەكتە حابارلانعان بولاتىن. قوناەۆ قالاسىندا الماتى وبلىسىنىڭ اۋماعىندا ورنالاسقان ءماسليحاتتار دەپۋتاتتارىنىڭ جاڭا اكىمدى تاعايىنداۋعا كەلىسىم بەرۋ جونىندەگى جيىنى وتۋگە ءتيىس ەدى.

مارات سۇلتانعازيەۆ ەڭبەك جولىن 1997 جىلى الماتى قالاسىنىڭ سالىق جۇيەسىندە باستاعان. ول اۋەزوۆ اۋدانى بويىنشا سالىق كوميتەتىنىڭ سالىق ءاۋديتى بولىمىندە سالىق ينسپەكتورى بولىپ جۇمىس ىستەدى.

1999-2001 جىلدارى الماتى قالاسى بويىنشا سالىق كوميتەتىندە سالىق ينسپەكتورىنان زاڭدى تۇلعالار ءاۋديتى ءبولىمىنىڭ باس سالىق ينسپەكتورىنا دەيىنگى ءتۇرلى قىزمەتتەردى اتقاردى.

2001-2006 جىلدارى الماتى قالاسىنىڭ بوستاندىق اۋدانى بويىنشا سالىق كوميتەتىنىڭ اۋديت ءبولىمىن باسقاردى.

2006-2008 جىلدارى الماتى قالاسى بويىنشا سالىق كوميتەتىنىڭ سالىقتىق اپەللياتسيالار، ءتۇسىندىرۋ جانە قۇقىقتىق قامتاماسىز ەتۋ باسقارماسىنا، كەيىن سالىق ءاۋديتى باسقارماسىنا جەتەكشىلىك ەتتى.

2008-2010 جىلدارى الماتى قالاسى بويىنشا سالىق دەپارتامەنتى باستىعىنىڭ ورىنباسارى بولدى.

2010-2012 جىلدارى قر قارجى مينيسترلىگىنىڭ سالىق جانە كەدەن زاڭناماسى ماسەلەلەرىن ۇيلەستىرۋ، كىرىستەردى تالداۋ جانە بولجاۋ دەپارتامەنتىنىڭ ديرەكتورى قىزمەتىن اتقاردى.

2012-2014 جىلدارى قر پرەزيدەنتى اكىمشىلىگىنىڭ الەۋمەتتىك-ەكونوميكالىق مونيتورينگ ءبولىمى سەكتورىنىڭ مەڭگەرۋشىسى بولىپ جۇمىس ىستەدى.

2014 جىلعى قاراشادان 2018 جىلعى قازانعا دەيىن قر قارجى مينيسترلىگى مەملەكەتتىك كىرىستەر كوميتەتىنىڭ الماتى قالاسى بويىنشا مەملەكەتتىك كىرىستەر دەپارتامەنتىن باسقاردى.

2018-2021 جىلدارى قر قارجى مينيسترلىگى مەملەكەتتىك كىرىستەر كوميتەتىنىڭ توراعاسى بولدى.

2021 جىلعى مامىردا قر قارجى ۆيتسە-ءمينيسترى، ال 2022 جىلعى قاڭتاردا قارجى ءبىرىنشى ۆيتسە-ءمينيسترى بولىپ تاعايىندالدى.

2022 جىلعى 11 ماۋسىمدا الماتى وبلىسىنىڭ اكىمى قىزمەتىنە كىرىستى. سول جىلدىڭ جەلتوقسانىندا بۇل لاۋازىمعا قايتا تاعايىندالدى.