6 قىركۇيەكتە وزبەكستان استاناسىندا ەلىدەگى العاشقى تۇراقتى زاماناۋي ونەر ورتالىعى — CCA Tashkent ءوز ەسىگىن ايقارا اشادى. جاڭا كەشەن 1912 جىلى سالىنعان تاريحي ديزەلدىك ەلەكتر ستانتسياسىنىڭ عيماراتىندا ورنالاسقان. فرانتسۋزدىق Studio KO ساۋلەت بيۋروسى جاڭعىرتقان بۇل نىسان ەندى كورمە زالدارى، زەرتتەۋ ءارحيۆى، كىتاپحانا جانە شەبەرلىك سىنىپتارى وتەتىن اشىق قالالىق كەڭىستىككە اينالدى.
ورتالىقتىڭ رەسمي اشىلۋى قارساڭىندا نىسانعا وزبەكستان پرەزيدەنتى شاۆكات ميرزيوەۆ ارنايى بارىپ، اتقارىلعان جۇمىستارمەن جانە الداعى جوسپارلارمەن تانىستى. بۇل زاماناۋي مادەنيەت پەن شىعارماشىلىق باستامالاردى مەملەكەتتىك دەڭگەيدە جۇيەلى قولداۋدىڭ ايقىن بەلگىسى بولىپ وتىر. بۇعان دەيىن ەلدىڭ حالىقارالىق مادەني برەندى كوبىنەسە سامارقاند، بۇحارا جانە حيۋانىڭ كونە ەسكەرتكىشتەرىمەن شەكتەلسە، جاڭا باستاما ورتالىق ازيانىڭ قازىرگى داۋىردەگى ينتەللەكتۋالدىق الەۋەتىن تانىتۋدى ماقسات ەتەدى.
ورتالىقتىڭ تۇساۋكەسەرى حالىقارالىق سارا رازا جەتەكشىلىك ەتەتىن «Hikmah» («دانالىق») اتتى ءىرى كورمەدەن باستالادى. 2027 جىلدىڭ قاڭتارىنا دەيىن سوزىلاتىن ەكسپوزيتسيا ءوڭىردىڭ رۋحاني مۇراسىن، تاريحي جادىن جانە قازىرگى فيلوسوفيالىق كوزقاراستارىن زەردەلەيدى. كورمەدە جەرگىلىكتى جانە شەتەلدىك سۋرەتشىلەردىڭ ەڭبەكتەرىمەن قاتار، ي. ۆ. ساۆيتسكي اتىنداعى مەملەكەتتىك ونەر مۋزەيى مەن اتاقتى سولومون گۋگگەنحايم مۋزەيى قورىنىڭ بىرەگەي تۋىندىلارى كوپشىلىك نازارىنا ۇسىنىلادى.
CCA Tashkent جاي عانا كورمە الاڭى ەمەس، سونىمەن قاتار XX جانە XXI عاسىرلارداعى ورتالىق ازيا ونەرىن جيناقتاپ، جۇيەلەيتىن ماڭىزدى عىلىمي-زەرتتەۋ جانە اكادەميالىق حابقا اينالماق. ورتالىقتىڭ ىسكە قوسىلۋى وڭىرلىك مادەنيەتتىڭ وزىندىك داۋىسىن جاھاندىق دەڭگەيدە ايقىنداپ، كورشىلەس ەلدەر اراسىنداعى شىعارماشىلىق بايلانىستاردى جاڭا بەلەسكە كوتەرەدى.
