1 قىركۇيەكتەن باستاپ فرانتسيادا «اسا جىلدام سانگە» (ultra-fast fashion) قارسى كۇرەس شارالارى اياسىندا كيىمگە جاڭا سالىق ەنگىزىلدى. جاڭا سالىق ەڭ الدىمەن Temu جانە Shein سياقتى ماركەتپلەيستەرگە قاتىستى بولادى.
قانداي كومپانيالاردىڭ «اسا جىلدام ءسان» ساناتىنا جاتاتىنى ەكى كريتەري بويىنشا انىقتالادى: بەلگىلى ءبىر جەتكىزۋشىنىڭ نارىققا شىعاراتىن كيىم كولەمى جانە ناقتى كيىمنىڭ جوندەۋ قۇنى.
وسى ەكى كريتەري بويىنشا تەكسەرۋدەن وتپەگەن ساتۋشىلار قوسىمشا سالىق تولەۋگە مىندەتتەلەدى. قازىردىڭ وزىندە قىتايلىق Temu, Shein جانە AliExpress ماركەتپلەيستەرى جاڭا تالاپتاردىڭ اياسىندا قالعانى بەلگىلى.
ولار ءۇشىن ەڭ تومەنگى سالىق مولشەرى ءىش كيىمگە — 0,50 ەۋرو (شامامەن 266 تەڭگە), فۋتبولكاعا — 2 ەۋرو (شامامەن 1069 تەڭگە), دجينسىعا — 9 ەۋرو (شامامەن 4782 تەڭگە), ال كۇرتەگە — 12 ەۋرو (شامامەن 6376 تەڭگە) بولادى.
2030 جىلعا قاراي بۇل سالىق مولشەرى ءبىر كيىمگە 19,50 ەۋروعا (شامامەن 10 361 تەڭگە) دەيىن ءوسۋى مۇمكىن.
فرانتسيا ۇكىمەتى جاڭا سالىق ەلگە ارزان ءارى ساپاسى تومەن كيىمدەردىڭ كوپتەپ كەلۋىن تەجەۋگە، سونداي-اق Temu مەن Shein سەكىلدى قىتايلىق ماركەتپلەيستەردىڭ نارىقتاعى ىقپالىن شەكتەۋگە كومەكتەسەدى دەپ ەسەپتەيدى.
ەۋروپا ەلدەرىندە «اسا جىلدام ءسان» ماسەلەسى بەلسەندى تالقىلانىپ جاتىر. باق مالىمەتىنشە، گەرمانيا، شۆەيتساريا جانە ەۋروپالىق وداقتىڭ باسقا دا ەلدەرىندەگى پوليگوندار قىتايدان كەلەتىن ارزان ءارى ساپاسىز كيىمدەرگە تولىپ بارادى.
سينتەتيكالىق ماتالاردى قايتا وڭدەۋ قيىن نەمەسە كەي جاعدايدا مۇمكىن ەمەس. ال قوقىسقا تاستالعان كويلەكتەر، شالبارلار مەن توپتاردى قايتا جوندەپ، پايدالانۋعا جاراتۋ دا كوبىنە مۇمكىن بولمايدى.
جىلدام ءسان يندۋسترياسى قورشاعان ورتانىڭ لاستانۋىنا ايتارلىقتاي ۇلەس قوسادى. توقىما ونەركاسىبى الەمدەگى پارنيكتىك گازدار شىعارىندىلارىنىڭ شامامەن 10 پايىزىنا جاۋاپ بەرەدى.
