وڭىردە جالپىعا بىردەي دەكلاراتسيالاۋ تارتىبىنە ەنگىزىلگەن وزگەرىستەر ءتۇسىندىرىلدى. وتكەن جىل ءۇشىن دەكلاراتسيانى كىمدەر تاپسىرۋعا مىندەتتى، قانداي مەرزىمدەر بەلگىلەنگەن جانە تالاپتاردى بۇزعان جاعدايدا قانداي جاۋاپكەرشىلىك قاراستىرىلعانى تۋرالى رسك بريفينگىندە اقمولا وبلىسى بويىنشا مەملەكەتتىك كىرىستەر دەپارتامەنتى ءبولىمىنىڭ باسشىسى نۇرلان ماحامبەت ايتىپ بەردى.
قازاقستاندا جالپىعا بىردەي دەكلاراتسيالاۋ جۇيەسى 2021 جىلدان باستاپ كەزەڭ-كەزەڭىمەن ەنگىزىلۋدە. بۇل رەتتە 2025 جىلعى 1 قاڭتاردان باستاپ ءتورتىنشى كەزەڭگە جاتاتىن ازاماتتار ءۇشىن دەكلاراتسيا تاپسىرۋ مىندەتى جويىلدى. ولاردىڭ قاتارىندا زەينەتكەرلەر، ستۋدەنتتەر، ءۇي شارۋاسىنداعى ايەلدەر جانە جەكە سەكتور قىزمەتكەرلەرى بار. شەتەلدە مۇلكى جانە جەكەلەگەن اكتيۆتەرى بار تۇلعالار بۇعان كىرمەيدى.
«جالپىعا بىردەي دەكلاراتسيالاۋ – ازاماتتاردىڭ تابىستارى مەن مۇلكىن دەكلاراتسيالاردى مەملەكەتتىك كىرىستەر ورگاندارىنا ۇسىنۋ ارقىلى باقىلاۋ تەتىگى»، – دەدى نۇرلان ماحامبەت.
بيىل 2025 جىل ءۇشىن 270.00 نىسانى بويىنشا كىرىستەر مەن مۇلىك تۋرالى دەكلاراتسيانى مەملەكەتتىك قىزمەتشىلەر جانە ولارعا تەڭەستىرىلگەن تۇلعالار مەن ولاردىڭ جۇبايلارى، بانكتەردىڭ، باعالى قاعازدار نارىعىنىڭ جانە ساقتاندىرۋ ۇيىمدارىنىڭ ءىرى قاتىسۋشىلارى، كۆازيمەملەكەتتىك سەكتور ۇيىمدارىنىڭ 10 پايىزدان استام قاتىسۋ ۇلەسىنە يە باسشىلارى مەن قۇرىلتايشىلارى، سونداي-اق جەكە پراكتيكامەن اينالىساتىن تۇلعالار تاپسىرۋى ءتيىس.
سونىمەن قاتار دەكلاراتسيانى ءوز بەتىنشە سالىق سالۋعا جاتاتىن كىرىستەر العان، شەتەلدىك جانە تسيفرلىق اكتيۆتەرى، سونداي-اق شەتەلدىك بانكتەردەگى شوتتارىندا جيىنتىعى 1000 اەك-تەن اساتىن قاراجاتى بار ازاماتتار تاپسىرۋعا مىندەتتى. تاعى ءبىر نەگىز – ەسەپتى كەزەڭدە جالپى قۇنى 20 000 اەك-تەن اساتىن مۇلىكتى ساتىپ الۋ.
«كىرىستەر مەن مۇلىك تۋرالى دەكلاراتسيادا قازاقستاندا جانە شەتەلدە ورنالاسقان كىرىستەر مەن مۇلىك، ءوز بەتىنشە سالىق سالۋعا جاتاتىن كىرىستەر، سونداي-اق مۇلىكتى ساتىپ الۋ، يەلىكتەن شىعارۋ جانە وتەۋسىز الۋ، شىعىستاردى جابۋ كوزدەرى تۋرالى مالىمەتتەر كورسەتىلەدى»، – دەپ ءتۇسىندىردى سپيكەر.
بۇدان بولەك، 250.00 نىسانى – اكتيۆتەر مەن مىندەتتەمەلەر تۋرالى دەكلاراتسيا قولدانىلادى. ونى، اتاپ ايتقاندا، شەتەلدە مۇلىكتىڭ بەلگىلى ءبىر تۇرلەرى بار كامەلەتكە تولعان قازاقستان رەسپۋبليكاسىنىڭ رەزيدەنت ازاماتتارى تاپسىرادى.
250.00 نىسانىن مىندەتتەمە تۋىنداعان جىلى 15 قىركۇيەكتەن كەشىكتىرمەي تاپسىرۋ قاجەت. 2025 جىل ءۇشىن 270.00 نىسانىنداعى دەكلاراتسيا 2026 جىلعى 15 قىركۇيەكتەن كەشىكتىرمەي تۇرعىلىقتى جەرى بويىنشا ۇسىنىلۋى ءتيىس.
دەكلاراتسيانى العاش رەت تاپسىرماعان جاعدايدا ەسكەرتۋ جاسالادى، ال تالاپتى قايتالاپ بۇزعان كەزدە 15 اەك مولشەرىندە ايىپپۇل سالىنادى. تولىق ەمەس نەمەسە انىق ەمەس مالىمەتتەردى قايتالاپ ۇسىنعانى ءۇشىن 3 اەك مولشەرىندە ايىپپۇل قاراستىرىلعان. شەتەلدەگى مۇلىكتى نەمەسە شەتەلدىك بانكتەردەگى شوتتارداعى قاراجاتتى دەكلاراتسيادا كورسەتپەۋ ارقىلى جاسىرۋ 100 اەك مولشەرىندە ايىپپۇل سالۋعا اكەپ سوعادى.
نۇرلان ماحامبەتتىڭ ايتۋىنشا، جۇيەنىڭ باستى مىندەتى – ازاماتتاردىڭ كىرىستەرى مەن مۇلكىنىڭ اشىقتىعىن قامتاماسىز ەتۋ جانە سالىقتىق اكىمشىلەندىرۋدىڭ تيىمدىلىگىن ارتتىرۋ.
