Resei prezidentı Vladimir Putinnıŋ bilıkten aiyrylyp, soǧys nätijesınde jauapqa tartyluy mümkın degen qorqynyşy Ukrainadaǧy soǧysty odan ärı uşyqtyruǧa itermeleuı yqtimal. Būl turaly The Economist basylymy Kremlge jaqyn derekközderge sılteme jasap jazdy, dep habarlaidy “Adyrna”.
Basylymnyŋ mälımetınşe, Putin bır kezderı özınıŋ jaqyn serıkterıne «Olar menı darǧa asady» degen. Alaida The Economist būl sözdıŋ naqty qandai jaǧdaida aitylǧanyn körsetpegen.
Kremlge jaqyn bırneşe derekközdıŋ aituynşa, Putin biyl jazda bırneşe apta boiy soǧystyŋ odan ärı qalai jalǧasatynyn oilastyrǧan. Nätijesınde Resei prezidentı soǧysty jaŋa deŋgeide uşyqtyruǧa baǧyt alǧan boluy mümkın.
Putinnıŋ mūndai şeşımıne AQŞ-pen qarym-qatynastaǧy jaǧdai da äser etuı yqtimal. Kreml basşysymen būrynnan bailanysy bar derekköz The Economist-ke Putin AQŞ Ortalyq barlau basqarmasynyŋ (SRU) direktory Djon Retklifftıŋ Mäskeuge jaqynda jasaǧan saparyn Vaşingtonnyŋ älsızdıgınıŋ belgısı retınde qabyldaǧanyn aitqan.
Basylym Putinnıŋ 2021 jylǧy qaraşada Ortalyq barlau basqarmasynyŋ direktory Bill Bernstıŋ Mäskeuge jasaǧan saparyna da osyndai közqaraspen qaraǧanyn jazady. Ol kezde Berns Resei prezidentıne Ukrainaǧa basyp kırmeu turaly eskertu üşın Mäskeuge barǧan. Alaida üş aidan keiın Resei Ukrainaǧa qarsy tolyq auqymdy soǧysty bastady.
The Economist yqtimal eskalasiianyŋ negızgı sebepterınıŋ bırı retınde Kremlge tüsıp jatqan ışkı qysymdy ataidy.
Basylymnyŋ baǧalauynşa, eger soǧys Reseidıŋ kem degende negızgı maqsattarynyŋ bırı — Donbasty tolyq basyp alumen aiaqtalmasa, būl Putin üşın jeŋılıs retınde qabyldanuy mümkın. Mūndai jaǧdai onyŋ bilıgıne, tıptı jeke basynyŋ qauıpsızdıgıne qater töndıruı yqtimal.
Sonymen bırge soǧysty qazırgı qarqynmen jalǧastyru Reseidıŋ ekonomikalyq resurstary men saiasi kapitalyn odan ärı sarqyp jatyr. Osyǧan bailanysty eskalasiia Putin üşın soǧystyŋ barysyn özgertuge jäne älsızdık tanytpauǧa mümkındık beretın qūral bolyp körınuı mümkın.
Basylym Reseidegı ışkı jaǧdaidyŋ kürdelene tüskenın qoǧamdyq köŋıl-küiden de baiqauǧa bolatynyn jazady.
The Economist keltırgen «Levada-sentr» saualnamasyna säikes, reseilıkterdıŋ 57 paiyzy eldegı jaǧdaidy «şielenıstı» dep baǧalaǧan. Saualnama barysynda soǧys, adam şyǧyny, mobilizasiia jäne bolaşaqqa degen senımsızdık negızgı mäselelerdıŋ qatarynda atalǧan.
Resei elitalary arasyndaǧy köŋıl-küi būdan da naşar boluy mümkın. Basylymǧa sūhbat bergen derekközderdıŋ bırı bes jylǧa juyq uaqytqa sozylǧan soǧystyŋ özın Resei üşın sätsızdık dep baǧalaǧan.
Resei NATO-men tıkelei qaqtyǧysqa bara ma?
The Economist Reseidıŋ aldaǧy uaqytta Ukrainaǧa qoldau körsetıp otyrǧan elderge qarsy diversiialyq jäne gibridtı äreketterdı küşeituı mümkın ekenın joqqa şyǧarmaidy.
Basylymnyŋ boljamynşa, Mäskeu qaru-jaraq jetkızıletın baǧyttarǧa qysym jasap, Europada äskeri önım şyǧaratyn käsıporyndarǧa qarsy äreketterge baruy yqtimal.
Soǧan qaramastan, Batys barlau qyzmetterı Putinnıŋ NATO-men tıkelei äskeri qaqtyǧysqa ūmtylyp otyrǧanyna dälel joq dep esepteidı.
The Economist derekterıne süiengen būl tūjyrymdar äzırge resmi türde rastalǧan aqparat emes. Basylym keltırgen pıkırler anonimdı derekközderdıŋ mälımdemelerıne negızdelgen.
