پرەزيدەنت قاسىم-جومارت توقاەۆ قازاقستان قۇرىلتايىنداعى ساياسي پارتيالار فراكتسيالارىنىڭ جەتەكشىلەرىمەن كەزدەسۋ وتكىزدى. بۇل تۋرالى بۇگىن، 31 تامىزدا اقوردا جازدى، دەپ حابارلايدى «ادىرنا» ءتىلشىسى.
جيىندا قاسىم-جومارت توقاەۆ ەرلان قاريندى قازاقستاننىڭ ۆيتسە-پرەزيدەنتى قىزمەتىنە كانديدات رەتىندە ۇسىندى. ال پرەمەر-مينيستر لاۋازىمىندا ولجاس بەكتەنوۆتى قالدىرۋدى ۇسىندى.
كەزدەسۋدە پرەزيدەنت جاڭا كونستيتۋتسيانىڭ 46-بابىنا سايكەس پرەمەر-مينيستر لاۋازىمىنا ۇسىنىلعان ولجاس بەكتەنوۆتىڭ كانديداتۋراسى جونىندە فراكتسيا جەتەكشىلەرىمەن كەڭەسۋگە ءتيىس ەكەنىن ايتتى.
تالقىلاۋعا «ادىلەت» پارتياسى فراكتسياسىنىڭ جەتەكشىسى ەربول اداەۆ، «اۋىل» پارتياسى فراكتسياسىنىڭ جەتەكشىسى قايرات ايتۋعانوۆ، «Respublica» پارتياسى فراكتسياسىنىڭ جەتەكشىسى ايداربەك قوجانازاروۆ، «اق جول» پارتياسى فراكتسياسىنىڭ جەتەكشىسى دانيا ەسپاەۆا، جالپىۇلتتىق سوتسيال-دەموكراتيالىق پارتيا فراكتسياسىنىڭ جەتەكشىسى اسحات راقىمجانوۆ قاتىستى.
پرەزيدەنت قاسىم-جومارت توقاەۆ 23 تامىزدا قۇرىلتاي دەپۋتاتتارىنىڭ سايلاۋىندا داۋىس بەرگەننەن كەيىن جۋرناليستەردىڭ سۇراقتارىنا جاۋاپ بەرىپ، قازاقستاننىڭ العاشقى ۆيتسە-پرەزيدەنتى جاقىن ۋاقىتتا تاعايىندالاتىنىن ايتقان بولاتىن.
“كەلەسى اپتادا نەمەسە ون كۇن ىشىندە ۆيتسە-پرەزيدەنت كىم ەكەنى ءمالىم بولادى. مەن ونى قازىر انىق ايتا المايمىن. ول بەلگىلى، سىزدەر جاقسى بىلەتىن ادام بولادى دەپ ويلايمىن”، – دەپ جاۋاپ بەرگەن ەل باسشىسى قاسىم-جومارت توقاەۆ تىلشىلەر سۇراعىنا.
بۇل مالىمدەمە ساياسي ورتادا ءتۇرلى بولجامنىڭ تۋىنا سەبەپ بولدى. ويتكەنى جاڭا كونستيتۋتسيالىق مودەلدەگى ۆيتسە-پرەزيدەنت لاۋازىمى فورمالدى قىزمەت ەمەس.
قولدانىستاعى زاڭناماعا سايكەس، ۆيتسە-پرەزيدەنت پرەزيدەنتتىڭ تاپسىرماسى بويىنشا قۇرىلتايمەن، ۇكىمەتپەن جانە وزگە دە مەملەكەتتىك ورگاندارمەن ءوزارا ءىس-قيمىل كەزىندە مەملەكەت باسشىسىنىڭ اتىنان وكىلدىك ەتەدى. ونىڭ كانديداتۋراسىن پرەزيدەنت ۇسىنادى، ال تاعايىنداۋ ءۇشىن قۇرىلتايدىڭ كەلىسىمى قاجەت.
