2023 جىل وتكەن جىلعا قاراعاندا ىشكى ساياسي وقيعالارعا تولى بولماق. بۇل تۋرالى مەملەكەتتىك كەڭەسشى ەرلان قارين ءوزىنىڭ تەلەگرام ارناسىندا جازدى، دەپ حابارلايدى “ادىرنا” ۇلتتىق پورتالى.
“الداعى 2023 جىلدىڭ ساياسي كۇن ءتارتىبى وتكەن 2022 جىلعىداي، پرەزيدەنت بەلگىلەگەن ساياسي رەفورمالار ۆەكتورىمەن ايقىندالادى. بۇل، ەڭ الدىمەن، ەل كونستيتۋتسياسىن جاڭارتۋ جونىندەگى رەسپۋبليكالىق رەفەرەندۋم ناتيجەلەرىن ءىس جۇزىندە ىسكە اسىرۋدى جالعاستىرۋعا قاتىستى.
جىل باسىنان مۇلدەم جاڭا ينستيتۋت – كونستيتۋتسيالىق سوت ءوز جۇمىسىن باستايدى. ول ادام قۇقىقتارى جونىندەگى ۋاكىل مەن باس پروكۋراتۋرانىڭ جاڭا كونستيتۋتسيالىق مارتەبەسىن جانە حالىقتىڭ الەۋمەتتىك وسال ساناتتارىن قولداۋ جونىندەگى ۋاكىلدىڭ جاڭا لاۋازىمىن قۇرۋمەن قاتار، ازاماتتاردىڭ نەگىزگى قۇقىقتارىن قورعاۋدىڭ جاڭا جۇيەسىن جابادى.
سونداي-اق، 1 قاڭتاردان باستاپ سايلاۋ زاڭناماسى مەن سايلاۋ جۇيەسىنە ەنگىزىلگەن بىرقاتار جاڭا وزگەرىستەر كۇشىنە ەنەدى. ءبىر مانداتتى سايلاۋ وكرۋگتەرى مەن ءتيىستى سايلاۋ كوميسسيالارىن قۇرۋ پروتسەسى باستالۋدا.
ەندى اۋماقتىق سايلاۋ كوميسسيالارىنىڭ مۇشەلەرى ءوز وكىلەتتىكتەرىن تۇراقتى كاسىبي نەگىزدە جۇزەگە اسىراتىن بولادى. بۇل سايلاۋ پروتسەدۋرالارىنىڭ ساپاسىن ارتتىرادى.
2022 جىلدىڭ كۇزىندە باستالعان جاڭا سايلاۋ تسيكلى جالعاسىن تابادى. 14 قاڭتاردا پارلامەنت سەناتىنىڭ دەپۋتاتتارىن سايلاۋ وتەدى. سودان سوڭ ءبىرىنشى جارتىجىلدىقتا ءماجىلىس پەن بارلىق دەڭگەيدەگى ءماسليحاتتار دەپۋتاتتارىن كەزەكتەن تىس سايلاۋ وتۋگە ءتيىس. الداعى سايلاۋ ناۋقانى مۇلدەم جاڭا ەرەجەلەر مەن نورمالار بويىنشا وتەتىنىن اتاپ وتكەن ءجون. بيىلدان باستاپ پيلوتتىق رەجيمدە اۋداندار مەن وبلىستىق ماڭىزى بار قالالاردىڭ اكىمدەرى تىكەلەي سايلانادى. اۋىل اكىمدەرىنىڭ كورپۋسىن جاڭارتۋ جالعاسادى. 350-دەن استام اۋىل، كەنت جانە اۋىلدىق وكرۋگ اكىمدەرىن تىكەلەي سايلاۋ جوسپارلانىپ وتىر. سايلاۋ مىڭنان استام اۋىلدىق ەلدى مەكەندى قامتيدى. وسىلايشا، 2023 جىل وتكەن جىلعا قاراعاندا ىشكى ساياسي وقيعالارعا تولى بولماق”،- دەپ جازدى ەرلان قارين.
