بيىل 1 قىركۇيەكتە قازاقستان مەكتەپتەرىندە مۇعالىمدەرگە گۇل شوعىن نەمەسە باسقا دا سىيلىقتاردى مەكتەپ اۋماعىندا تابىستاۋعا رۇقسات ەتىلمەيدى. بۇل تۋرالى وقۋ-اعارتۋ ءبىرىنشى ۆيتسە-ءمينيسترى شىنار اقپاروۆا وكق بريفينگىندە ايتتى، دەپ حابارلايدى "ادىرنا".
بريفينگ بارىسىندا جۋرناليستەر اتا-انالاردىڭ مۇعالىمدەرگە گۇل سىيلاۋىنا قاتىستى تالاپتاردى ناقتىلاپ، گۇل شوعىنا قانشا قاراجات جۇمساۋعا بولاتىنىن سۇرادى.
مينيسترلىك وكىلىنىڭ ايتۋىنشا، بۇل ماسەلە بويىنشا جەرگىلىكتى اتقارۋشى ورگاندارعا ارنايى حات جولدانعان.
«مەكتەپ قابىرعاسىندا گۇل نەمەسە قانداي دا ءبىر سىيلىق تارتۋ ەتۋگە رۇقسات ەتىلمەيدى. ءبىز بۇل تالاپتى ناقتى كورسەتتىك. سوندىقتان وعان ەشقانداي قاجەتتىلىك جوق»، – دەدى شىنار اقپاروۆا.
وسىعان بايلانىستى مينيسترلىك مۇعالىمگە ۇسىنىلاتىن گۇل شوعىنىڭ بەلگىلى ءبىر شەكتى باعاسىن بەلگىلەگەن جوق. ۆەدومستۆونىڭ تۇسىندىرمەسى ءدال مەكتەپ اۋماعىندا تابىستالاتىن سىيلىقتارعا قاتىستى.
جاڭا وقۋ جىلىنىڭ العاشقى كۇنىندە بارلىق مەكتەپتە بىرىڭعاي سىنىپ ساعاتتارى ۇيىمداستىرىلادى. كوللەدجدەردە ونىڭ ورنىنا كۋراتورلىق ساعاتتار وتكىزىلەدى.
شىنار اقپاروۆانىڭ مالىمەتىنشە، ءىس-شارالاردىڭ ۇزاقتىعى شامامەن 45 مينۋت بولادى.
مينيسترلىكتىڭ قازىرگى ۇستانىمى بۇعان دەيىنگى تۇسىندىرمەدەن وزگەشە. 2024 جىلى وقۋ-اعارتۋ مينيسترلىگى مۇعالىمدەرگە گۇل سىيلاۋعا بولاتىنىن ايتىپ، ونى پەداگوگكە دەگەن قۇرمەت پەن العىستىڭ بەلگىسى رەتىندە باعالاعان ەدى. سول كەزدەگى مينيستر عاني بەيسەمباەۆ تا وقۋشىلاردىڭ ۇستازدارعا گۇل ۇسىنۋىن جاقسى ءداستۇر دەپ اتاعان.
ايتا كەتەيىك، 2026-2027 وقۋ جىلى قازاقستان مەكتەپتەرىندە 1 قىركۇيەكتە باستالىپ، 25 مامىردا اياقتالادى. ال ءبىرىنشى سىنىپ وقۋشىلارى ءۇشىن اقپان ايىندا قوسىمشا دەمالىس قاراستىرىلعان.
