بۇگىن رەسپۋبليكامىزدىڭ تۇكپىر-تۇكپىرىندە سان مىڭداعان شاكىرتتەر ءۇشىن سوڭعى قوڭىراۋ سوعىلدى. 2021-2022 وقۋ جىلى الماتى قالاسىنداعى №92 ماحاتما گاندي اتىنداعى مامانداندىرىلعان مەكتەپ ليتسەي ءۇشىن دە تابىستى اياقتالدى.
تولىعىمەن ءداستۇرلى وقۋ فورماتىنا كوشۋمەن ەرەكشەلەنگەن وقۋ جىلىندا مەكتەپپەن قايتا قاۋىشقان بالالار مەن ۇستازداردىڭ قۋانىشىندا شەك بولمادى. اتالعان مەكتەپ ليتسەيدىڭ دارىندى شاكىرتتەرى اتا-انالارى مەن مۇعالىمدەرىنىڭ ۇمىتتەرىن اقتاپ، سان الۋان جارىستار مەن سايىستاردا وزا شاۋىپ بايگە الدى. ولاردىڭ قاتارىندا «جۇزدەن – جۇيرىك، مىڭنان – تۇلپار» اتانعان «دارىن» رەسپۋبليكالىق عىلىمي-پەداگوگيكالىق ورتالىعىنىڭ ۇيىمداستىرۋىمەن وتكىزىلگەن عىلىمي جوبا جارىستارىنىڭ جۇلدەگەرلەرى 11 «ا» سىنىپ وقۋشىلارى كوشكىمباەۆا جانيا، شىندالي ۇلدانا، 11 «ءا» سىنىپ وقۋشىلارى داۋلەتقوجا دايربەك، شامەرحان امينا، يزباسار ديانا، كالەن اياجان، قازاق ءتىلى مەن ادەبيەتىنەن وتكەن قالالىق وليمپيادادا 2-ورىن العان 11 «ب» سىنىپ وقۋشىسى مىرزامۇرات ايىم، XIV پرەزيدەنتتىك وليمپيادا جۇلدەگەرلەرى: 11-سىنىپ وقۋشىلارى شىندالي ۇلدانا، سابيبولدا اقجان، شادەن توميريس بار. ولار – مەكتەپ شەجىرەسىندە ءوز اتتارىن قالدىرعان تالانتتى جاستار.
2022 جىلى جاراتىلىستانۋ-ماتەماتيكالىق باعىتتاعى №92 ماحاتما گاندي اتىنداعى مامانداندىرىلعان مەكتەپ ليتسەيدى 101 وقۋشى بىتىرەدى. ولاردىڭ 14-ءى ەرەكشە ۇلگىدەگى «التىن بەلگى» اتتەستاتىنان ۇمىتكەرلەر بولسا، ەرەكشە ۇلگىدەگى ۇزدىك اتتەستاتتان ۇمىتكەرلەر سانى- 10.
سوڭعى قوڭىراۋ سالتاناتىندا ءسوز العان «2014 جىلعى ۇزدىك پەداگوگ» سىيلىعى مەن قر ءبىلىم جانە عىلىم مينيسترلىگىنىڭ بىرنەشە رەت قۇرمەت گراموتالارىمەن ماراپاتتالعان، الماتى قالاسىنداعى №92 ماحاتما گاندي اتىنداعى مامانداندىرىلعان مەكتەپ ليتسەيدىڭ ديرەكتورى كۋلجان ساۋىتقىزى شاجاباەۆا تۇلەكتەرگە ءسات ساپار تىلەدى.
ء"ار تۇلەگىمىزگە مەملەكەتتىك ەمتيحاندا جاقسى ناتيجە كورسەتۋلەرىنە تىلەكتەسپىن. مەن سىزدەردىڭ اتا-انالارىڭىز مەن ۇستازدارىڭىزدىڭ سەنىمدەرىن اقتايتىندارىڭىزعا كامىل سەنەمىن. مەكتەپ تۇلەكتەرىنىڭ ءبىلىمىن شىڭدايتىن بيىك اسۋ – ۇلتتىق بىرىڭعاي تەستىلەۋدە شاكىرتتەرىمىزگە تولاعاي تابىس پەن ساتتىلىك تىلەيمىن. ەگەمەن ەلىمىزدىڭ بولاشاعى – سىزدەردىڭ قولدارىڭىزدا، سوندىقتان قاي كەزدە دە تەرەڭ ءبىلىم الۋ جولىندا تالماي ىزدەنىپ، قاجىماس قايرات پەن مۇقالماس جىگەردىڭ ارقاسىندا ەل تىزگىنىن نىق ۇستار ازامات بولۋلارىڭىزعا ىزگى تىلەگىمدى بىلدىرەمىن. قازاقستاننىڭ مارتەبەسىن الەمدىك دەڭگەيدە ارتتىراتىن سىزدەرسىزدەر! قادامدارىڭىزعا ءساتتى ساپار، ومىرلەرىڭىزگە قۇتتى قادام تىلەيمىن.
كەز كەلگەن ەل ءوزىنىڭ كەلەشەگىن وسكەلەڭ ۇرپاعىمەن بايلانىستىراتىنى ءسوزسىز. ەلىمىزدىڭ ەرتەڭى، مەملەكەتىمىزدىڭ جارقىن بولاشاعى ءبىلىمدى دە بىلگىر جاستاردىڭ قولىندا ەكەندىگىن نىق سەنىممەن ايتامىن. ەندەشە، مەكتەپ پەن ونىڭ جۇرەگى – ۇستازعا جۇكتەلەتىن جۇك اۋىر. وقۋشىنى زامان تالابىنا ساي، الەمدىك وزگەرىستەرگە ىلەسە الاتىن باسەكەگە قابىلەتتى تۇلعا ەتىپ قالىپتاستىرۋ – بۇگىنگى كۇننىڭ باستى تالابى، سوندىقتان وسكەلەڭ ۇرپاققا ساپالى ءبىلىم مەن سانالى تاربيە بەرىپ جاتقان مۇعالىمدەر قاۋىمىنا ايتار العىسىم شەكسىز. ۇلاعاتتى ۇستازدارىمىزدىڭ جاڭا قازاقستاننىڭ ءبىلىمدى دە بىلىكتى زياتكەر تۇلعالارىن قالىپتاستىرۋداعى ەرەن ەڭبەگىنە شىعارماشىلىق تابىس تىلەيمىن!"-دەدى ول.
"ادىرنا"ۇلتتىق پورتالى
