50 ۇلتتىق تاعام قازاقستانداعى مەكتەپ مازىرىنە ەنگىزىلەدى، دەپ حابارلايدى «ادىرنا» ۇلتتىق پورتالى ءبىلىم مينيسترلىگىنىڭ ءباسپاسوز قىزمەتىنە سىلتەمە جاساپ.
«ءار مەكتەپ وقۋشىلار ءۇشىن «سالاۋاتتى ءومىر سالتىن ۇستاناتىن مەكتەپ» بولۋى كەرەك، سوندا ولاردىڭ كەز كەلگەن ءىس-ارەكەتى ساۋىقتىرۋ جانە پەداگوگيكالىق باعىتتا بولادى. «ۇلتتىق مەكتەپ اسحاناسى» جوباسى ۇلتتىق تاعام مادەنيەتىن قالىپتاستىرۋعا جانە مەكتەپ اس مازىرىنە 50 ۇلتتىق تاعامدى ەنگىزۋگە مۇمكىندىك بەرەدى. بۇل عاسىرلار بويى قالىپتاسقان راتسيون، كونە تاجىريبەنىڭ جەمىسى»، - دەدى قر ءبىلىم ۆيتسە-ءمينيسترى ناتاليا جۇمادىلداەۆا.
ايتا كەتەيىك، استانانىڭ التى مەكتەبىندە «ۇلتتىق مەكتەپ اسحاناسى» پيلوتتىق جوباسىن ىسكە اسىرۋ باستالدى، وندا مەكتەپتە تاماقتانۋ مادەنيەتىن قالىپتاستىرۋ بويىنشا كەزەڭ-كەزەڭىمەن شارالار كەشەنى قاراستىرىلعان.
