فوتو: Reuters
نەپالدا جويقىن سۋ تاسقىنى مەن لاي كوشكىنىنەن قازا تاپقاندار سانى 469 ادامعا جەتتى. 800-دەن استام تۇرعىن مەن شەتەلدىك ازاماتتان ءالى حابار جوق. قۇتقارۋ جۇمىستارى جالعاسىپ جاتقانىمەن، وڭىردە جاڭا سۋ تاسقىنىنىڭ قاۋپى ساقتالىپ وتىر. بۇل تۋرالى ۆۆس جازدى، دەپ حابارلايدى "ادىرنا".
اپات تيبەتپەن شەكارالاس اۋماقتا بولعان. قاتتى لاي كوشكىنى تاۋلى وزەن ارناسىن بوگەپ، سۋ دەڭگەيىنىڭ كۇرت كوتەرىلۋىنە سەبەپ بولعان. تابيعي اپاتتان نەپالمەن قاتار قىتايدىڭ تيبەت ايماعى دا زارداپ شەكتى. قىتايلىق باق-تىڭ مالىمەتىنشە، تيبەتتە كەمىندە ءۇش ادام قازا تاۋىپ، 550-دەن استام اداممەن بايلانىس ۇزىلگەن.
نەپال پرەمەر-ءمينيسترى بالەندرا شاحتىڭ ايتۋىنشا، ىزدەۋ-قۇتقارۋ جۇمىستارىنا 13 مىڭنان استام اسكەري قىزمەتشى مەن پوليتسيا قىزمەتكەرى جۇمىلدىرىلعان. بەيسەنبى كۇنى اپات ايماعىنا 69 اۋە رەيسى جاسالىپ، 573 ادام قاۋىپسىز جەرگە شىعارىلعان.
زارداپ شەككەندەر ءۇشىن ۋاقىتشا ورنالاستىرۋ ورىندارى ۇيىمداستىرىلىپ، جارالانعاندارعا مەديتسينالىق كومەك تەگىن كورسەتىلىپ جاتىر. ۇكىمەت قازىرگى ۋاقىتتا ادامداردى قۇتقارۋعا، حابار-وشارسىز كەتكەندەردى ىزدەۋگە جانە تۇرعىندارعا گۋمانيتارلىق كومەك جەتكىزۋگە باسىمدىق بەرىپ وتىر.
جاڭا تاسقىن قاۋپى بار
قۇتقارۋشىلارعا تابيعي اپاتتىڭ قايتالانۋ قاۋپى ايتارلىقتاي كەدەرگى كەلتىرۋدە. العاشقى تاسقىن بولعان جەردە بحوتەكوشي وزەنىندە ۇيىندىلەردىڭ جينالۋىنان كول پايدا بولعان. ونىڭ سۋ دەڭگەيى قازىر كوتەرىلىپ جاتىر.
نەپالدىڭ توتەنشە جاعدايلار قىزمەتى كولدەگى سۋدىڭ ارناسىنان اسىپ، جاڭا سۋ تاسقىنىن تۋدىرۋى مۇمكىن ەكەنىن ەسكەرتتى. قىتايدىڭ مەملەكەتتىك باق-تارى بۇل جاعداي 1 قىركۇيەك شاماسىندا بولۋى ىقتيمال ەكەنىن حابارلادى.
قىزىل كرەست ۇيىمىنىڭ نەپالداعى دەلەگاتسياسىن باسقاراتىن دەۆيد فيشەردىڭ ايتۋىنشا، جاڭا تاسقىن قاۋپى قۇتقارۋ جانە گۋمانيتارلىق كومەك كورسەتۋ جۇمىستارىن قيىنداتىپ وتىر.
ء«بىزدى ەڭ قاتتى الاڭداتاتىنى – جاڭا سۋ تاسقىنى قاۋپى بار اۋماقتا ءالى جۇرگەن ادامداردىڭ ءومىرى»، – دەدى ول.
نەپال بيلىگىنىڭ مالىمەتىنشە، 826 ادام حابار-وشارسىز كەتكەن. ولاردىڭ اراسىندا تۋريستەر، جەرگىلىكتى تۇرعىندار جانە قاۋىپسىزدىك كۇشتەرىنىڭ قىزمەتكەرلەرى بار.
حابارسىز كەتكەندەردىڭ ىشىندە بىرنەشە ەلدىڭ ازاماتتارى بار:
ءۇندىستان – 177 ادام;
اقش – كەمىندە 63 ادام;
ۋكراينا – 53 ادام;
مالايزيا – 28-دەن 55 ادامعا دەيىن;
اۆستراليا – 34 ادام;
ۇلىبريتانيا – 33 ادام;
كانادا – 25 ادام;
وڭتۇستىك كورەيا – 9 ادام;
گەرمانيا – كەمىندە 8 ادام;
سينگاپۋر – 6 ادام;
وڭتۇستىك افريكا رەسپۋبليكاسى – 6 ادام;
رەسەي – 5 ادام;
جاپونيا – 5 ادام;
جاڭا زەلانديا – كەمىندە 5 ادام.
سونداي-اق، ءبىر قازاقستان ازاماتى دا حابار-وشارسىز كەتكەن.
بۇل تۋرالى قازاقستاننىڭ سىرتقى ىستەر مينيسترلىگى حابارلاعان بولاتىن.
الدىن الا مالىمەت بويىنشا، قازاقستاندىق تۋريستىك توپ قۇرامىندا نەپالدان قىتايعا شەكارا ارقىلى وتكەن. قازىر ونىڭ قايدا ەكەنى بەلگىسىز.
نەپال بيلىگى بۇعان دەيىن حابار-وشارسىز كەتكەن 100-گە جۋىق ۇندىستاندىق تۋريست پەن 25 قىتايلىق جۇمىسشىنىڭ تابىلعانىن حابارلاعان.
ۋكراينا سىرتقى ىستەر مينيسترلىگى نەپالدا كەمىندە 53 ۋكراينالىق تۋريستپەن بايلانىس ۇزىلگەنىن مالىمدەدى. ۆەدومستۆو ازىرگە ۋكراينالىقتاردىڭ قازا تاپقاندار نەمەسە زارداپ شەككەندەر اراسىندا بار-جوعى تۋرالى اقپارات تۇسپەگەنىن اتاپ ءوتتى.
اپات سالدارىنان قازا تاپقانداردىڭ دەنەلەرى وزەننىڭ تومەنگى اعىسىنداعى اۋدانداردان دا تابىلۋدا. چيتۆان اۋدانىندا 103 ادامنىڭ دەنەسى وزەننەن شىعارىلعان.
جەرگىلىكتى اۋرۋحانالار مايىتتەردىڭ بارلىعىن قابىلداي الماي جاتقاندىقتان، بيلىك ارنايى شاتىرلار تىگىپ، قازا بولعانداردىڭ تۋىستارىن قابىلداۋعا دايىندىق جۇرگىزۋدە. تۇلعاسى انىقتالماعان مايىتتەر دنق ساراپتاماسىنا جىبەرىلەدى.
قۇتقارۋ جۇمىستارىنا ءۇندىستان دا كومەك كورسەتىپ جاتىر. اپاتتان زارداپ شەككەن اۋداندارعا تىكۇشاقتار ارقىلى شاتىرلار، ازىق-تۇلىك جانە باسقا دا قاجەتتى زاتتار جەتكىزىلۋدە.
قازىر نەپالدا مىڭداعان قۇتقارۋشى مەن اسكەري قىزمەتكەر تابيعي اپاتتىڭ زارداپتارىن جويۋعا جۇمىلدىرىلعان. بيلىك تۇرعىنداردى وزەن جاعالاۋلارىنان اۋلاق بولۋعا جانە جاڭا تاسقىن قاۋپى تۋرالى ەسكەرتۋلەردى مۇقيات ورىنداۋعا شاقىردى.
