الماتىدا سايلاۋ تاڭى داۋىس بەرۋمەن قاتار، ۋچاسكەلەرگە العاشقىلاردىڭ ءبىرى بولىپ كەلگەن تۇرعىندارعا ارنالعان شاعىن سىيلىقتارمەن باستالدى. قالانىڭ ءار اۋدانىندا العاشقى سايلاۋشىلارعا ەستەلىك تارتۋ ازىرلەندى.
المالى اۋدانىندا تاڭەرتەڭنەن سايلاۋشىلار لەگى بايقالدى. العاش كەلگەن تۇرعىندارعا بلوكنوت، «قازاقستان» شوكولادى جانە كەپكا تابىستالدى. مۇنداي سىيلىقتار سايلاۋ ۋچاسكەلەرىندە جىلى ءارى مەرەكەلىك كوڭىل كۇي قالىپتاستىرۋعا سەپ بولدى.
تۇركسىب اۋدانىندا دا العاشقى سايلاۋشىلارعا قۋاتتاعىش، ەلەكتر شاينەگى، «قازاقستان» شوكولادى، كۇندەلىك جانە باسقا دا ەستەلىك سىيلىقتار دايىندالدى.
الماتىنىڭ وزگە اۋداندارىندا دا العاشقى سايلاۋشىلارعا سىيلىق تابىستالىپ جاتىر. ماسەلەن، №60 سايلاۋ ۋچاسكەسىندە داۋىس بەرگەن زەينەتكەر ءالىپباي جۇمانتاەۆقا كەپكا مەن شوكولاد سىيعا بەرىلدى. ونىڭ ايتۋىنشا، سايلاۋعا ەرتە كەلىپ داۋىس بەرۋ ادەتكە اينالعان.
«ازاماتتىق بورىشىمدى ەرتەرەك ورىنداۋدى ءجون كوردىم»، — دەدى ول.
مۇنداي باستاما داۋىس بەرۋ كۇنىندەگى شاعىن ءداستۇردىڭ بىرىنە اينالىپ، العاشقى سايلاۋشىلارعا ەرەكشە كوڭىل كۇي سىيلاپ وتىر.
