جۋرناليستتەر مەن بەلسەندى جاستار «جاستار ءۇنى» جاس كانديداتتاردى قولداۋ بلوگىن قۇردى. بۇل تۋرالى بۇگىن جۋرناليستتەر ەرقانات كوپجاسارۇلى، اقبوپە تاڭىربەرگەن، نۇرسۇلتان قۇرمان جانە قر پارلامەنتى ءماجىلىسى دەپۋتاتتىعىنا ۇمىتكەرلەر ياكوۆ فەدوروۆ پەن ماقسات حالىق قازاقستان ءباسپاسوز كلۋبىندا وتكەن ءباسپاسوز ماجىلىسىندە جاريا ەتتى، دەپ حابارلايدى “ادىرنا” ۇلتتىق پورتالى.
قازاقستان ۇلتتىق ارناسى «اشىق الاڭ» ساياسي توك-شوۋىنىڭ جۇرگىزۋشىسى ەرقانات كوپجاسارۇلى ايتۋىنشا «جاستار ءۇنى» جاس كانديداتتاردى قولداۋ بلوگىنىڭ قاتارىنا كەز كەلگەن جاس كانديداتتاردى قورعايمىن، قولدايمىن، كەڭەس بەرەمىن دەگەن بەلسەندى جاستار كىرە الادى:
«ءبىزدىڭ باستى ماقساتىمىز - قوعامدا پىكىرىن اشىق ءبىلدىرىپ جۇرگەن، ءوز ماماندىعىنىڭ جىلىگىن شاعىپ مايىن ىشكەن، ەلدىڭ ىشىندەگى پروبلەمالاردان حاباردار ءار سالانىڭ بەلسەندى جاستارىن حالىق اراسىنداعى قولداۋىنا بايلانىستى ءماجىلىس پەن بارلىق دەڭگەيدەگى ءماسليحاتتار سايلاۋىنا قاتىسىپ، باق سىناپ كورۋگە شاقىرۋ»، - دەيدى ول.
«ەۋرازيا» تەلەارناسىنىڭ ءجۋرناليسى اقبوپە تاڭىربەرگەن ءوز جەكە كەيسىمەن ءبولىسىپ، جاس دەپۋتاتتار كوبەيسە، ءماجىلىستىڭ دە ۇيقىسى اشىلار ەدى دەگەن وي ءبىلدىردى:
«مەن ءتىلشى رەتىندە اۋىل-ايماقتى ارالاپ، پروبلەماسىن ەفيردەن كورسەتكەندە، سول اۋداننان شىققان دەپۋتاتتار «حالىقتىڭ پروبلەماسىن شەشەيىك، مىنانداي ماسەلە بار ەكەن» دەپ نازار اۋدارۋدىڭ ورنىنا، ول اۋىلدىڭ اكىمى جاقسى ازامات دەپ، مىنا جۋرنالستىكى نە سۇمدىق، ءبىزدىڭ اۋىلدىڭ جامان جاقتارىن ڭعانا كورسەتتى دەپ شىعاتىن ەدى. بىراق سول اۋىلدا تۋعان جەرىنىڭ پروبلەماسىن شىرىلداپ ءجۇرىپ كوتەرەتىن جاستار بار. ولار ويىن دا اشىق ايتادى، ساۋاتتى. وسىنداي جاستار قازىر ءبىر مانداتتىق جۇيە بويىنشا سايلاۋعا ءتۇسىپ جاتىر ەكەن ولارعا قولداۋ كەرەك»، - دەپ اتاپ ءوتتى.
ال تەلەجۇرگىزۋشى، بلوگەر نۇرسۇلتان قۇرمان ءوز تاراپىنان جاس كانديداتتارعا الەۋەمتتىك جەلىدە قولداۋ كورسەتەتىنى تۋرالى ايتتى:
«مەن ءوزىم بارماسام دا، سول سالاعا بارعىسى كەلىپ، ەلىمىزدەگى زاڭ سالاسىندا وزگەرىستەر ەنگىزىپ، حالىققا پايداسى تيەتىن ازاماتتاردى قولداعىم كەلەدى. سوندىقتان دا، تۇراقتى جاس كورەرمەندەردەن تۇراتىن اۋديتورياسى بار يۋتۋب كانالىمدا «تەلەدەبات» ۇيىمداستىرىپ، ءار پارتيادان ۇسىنىلىپ جاتقان جاس كانديداتتاردى شاقىراتىن بولامىن. ونىڭ بارلىعى تىكەلەي ەفيردە وتەدى. ەكىنشىدەن، بارلىق دەڭگەيدەگى كانديداتتارعا پودكاست، ينتەرۆيۋ رەتىندە كومەك كورسەتەتىن بولامىن».
تانىمال بلوگەر ياكوۆ فەدوروۆ قازاقستاندىق جاستارعا قاتىستى ستەرەوتيپتەرگە توقتالدى:
«بىزدە قازاقستاندىق جاستار ساياساتقا قىزىقپايدى دەگەن ستەرەوتيپ بار، الايدا بۇل ولاي ەمەس. بۇعان دەيىن جاستاردا مۇمكىندىك پەن تاڭداۋ بولعان جوق. ال، قازىرگى ۋاقىتتا كەز كەلگەن ازامات ءوزىن-ءوزى ۇسىنا الادى. ەڭ باستىسى – جاستار وزگەرىس ەنگىزەمىن دەگەن شىن نيەتتەرىمەن بارا جاتىر»، - دەدى ول.
ەكونوميست، قر پارلامەنتى ءماجىلىسى دەپۋتاتتىعىنا ۇمىتكەر ماقسات حالىق پارتيالاردان جاسالىپ جاتقان قولداۋعا توقتالدى:
«شىنى كەرەك، ءبىزدى بىردە-ءبىر پارتيا قولداپ جاتقان جوق، «امانات»، «اۋىل»، «رەسپۋبليكا» پارتياسى بولسىن. سونىقتان دا، قازىرگى ۋاقىتتا ءوزىمىزدى ۇسىنىپ، بولاشاققا ۇلەس قوسامىز دەگەن نيەت بار. ارينە، وڭىرلەردە ادىلەتسىزدىك ورىن الاتىن شىعار، بىراق وزگەرىستەردى ءوزىمىز جاساپ، قاڭتاردان باستاپ ايتىلىپ كەلە جاتقان «جاڭا قازاقستاندى» بىرگە قۇرۋ كەرەكپىز»، - دەپ اتاپ ءوتتى.
ايتا كەتەيىك، «جاستار ءۇنى» جاس كانديداتتاردى قولداۋ بلوگى – ءوز-ءوزىن ءبىر مانداتتىق جۇيەمەن ۇسىنعانداردى دا، پارتيا اتىنان ۇسىنىلىپ وتىرعانداردى دا ءبولىپ-جارماي قولداۋعا دايىن. باستىسى 21-35 جاس ارالىعىنداعى جاستار ساناتىنا جاتاتىن ازاماتتار بولۋى ءتيىس.
