23 ناۋرىز كۇنى تۇركيانىڭ وپپوزيتسيالىق رەسپۋبليكالىق حالىق پارتياسىنىڭ (رحپ) پرايمەريزىنە 15 ميلليون ادام قاتىسىپ، قىزمەتىنەن شەتتەتىلگەن جانە قاماۋعا الىنعان ىستامبۇل مەرى ەكرەم يماموعلىعا قولداۋ كورسەتتى. بۇل تۋرالى Sözcü باسىلىمى جازدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، يماموعلىنىڭ جاقتاستارى جەكسەنبى كۇنگى پرايمەريزدە داۋىس بەرىپ، ونى تۇركيانىڭ ەڭ كونە ساياسي پارتياسى – رەسپۋبليكالىق حالىق پارتياسىنىڭ (Cumhuriyet Halk Partisi) اتىنان پرەزيدەنتتىككە رەسمي كانديدات ەتىپ سايلادى. بۇل تۋرالى داۋىس بەرۋ ۇيىمداستىرۋشىلارى مالىمدەدى.
"23 ناۋرىزدا بولاشاق پرەزيدەنتىمىز ەكرەم يماموعلىعا پارتيامىزدىڭ 1,653 ميلليون مۇشەسى داۋىس بەردى. بۇل قازىرگى بيلىكتىڭ توڭكەرىس جاساۋ ارەكەتىنە بەرىلگەن ەڭ باتىل جاۋاپ. سونداي-اق ءبىز بارلىق ازاماتتاردى ءبىزدىڭ داۋىس بەرۋ جاشىكتەرىمىزگە كەلىپ، ءوز تاڭداۋىن جاساۋعا شاقىردىق. ولار تاراپىنان 13,21 ميلليون داۋىس جينالدى. جالپى العاندا، 14,85 ميلليوننان استام ادام ەكرەم يماموعلىعا قولداۋ ءبىلدىردى", – دەدى پارتيا توراعاسى وزگۇر وزەل.
ول ەردوعاندى كەزەكتەن تىس پرەزيدەنتتىك سايلاۋ وتكىزۋ تۋرالى شەشىم قابىلداۋعا جانە يماموعلىعا قارسىلاس رەتىندە شىعۋعا شاقىردى. پرايمەريز ناتيجەلەرى جاريالانعاننان كەيىن ەكرەم يماموگلۋ سيليۆري تۇرمەسىنەن ءوزىنىڭ العاشقى جازباسىن جاريالادى.
"مەن سىزدەرمەن مەنى ەرەكشە قۋانتقان جاڭالىقتاردى بولىسكىم كەلەدى. ءبىزدىڭ رەسپۋبليكالىق حالىق پارتياسىنىڭ پرەزيدەنتتىككە الدىن الا سايلاۋىنا رەكوردتىق دەڭگەيدە ازاماتتار قاتىستى. 15 ميلليون وتانداسىمىز داۋىس بەردى. بۇل ەلدە بيلىكتىڭ قىسىمىنان، كۇيرەگەن ەكونوميكادان، بىلىكسىزدىكتەن جانە زاڭسىزدىقتان زارداپ شەگىپ وتىرعان ونداعان ميلليون ادام سايلاۋ جاشىكتەرىنە كەلدى", – دەپ جازدى ول.
بۇل ۋاقىتتا ىستامبۇل مەن تۇركيانىڭ باسقا قالالارىندا ەكرەم يماموعلىنىڭ قاماۋعا الىنۋىنا قارسى بەسىنشى كۇن قاتارىنان نارازىلىق شەرۋلەرى جالعاسىپ جاتىر. Reuters اگەنتتىگىنىڭ حابارلاۋىنشا، بۇگىن تۇندە ىستامبۇلدا قاماۋعا الىنعان مەردى قولداۋ ءۇشىن جارتى ميلليونعا دەيىن ازامات جينالعان. پوليتسيامەن قاقتىعىستار ورىن الدى.
ەسكە سالساق، ىستامبۇل مەرى ەكرەم يماموعلى قارجىلىق قىلمىستار بويىنشا ايىپتالىپ، قاماۋعا الىنعان. بىراق سوت ونى تەرروريزم بويىنشا ايىپتاۋدى جوققا شىعاردى. 23 ناۋرىزدا تۇركيانىڭ ىشكى ىستەر مينيسترلىگى ونى ۋاقىتشا تۇردە ىستامبۇل مەرى قىزمەتىنەن شەتتەتۋ تۋرالى شەشىم قابىلداعانىن مالىمدەدى.
ىستامبۇل مەرىنىڭ قاماۋعا الىنۋىنان كەيىن انكارانىڭ وپپوزيتسيالىق مەرى مانسۋر ياۆاش كەزەكتەن تىس پرەزيدەنتتىك سايلاۋ وتكىزۋگە شاقىردى.
