جىل سوڭىنا دەيىن قاراعاندى وبلىسىنىڭ ەلدى مەكەندەرىندە 70 مودۋلدىك ۆەتەريناريالىق پۋنكت ورناتىلادى.
قازىر 46 اۋىلدا ءتيىستى جۇمىستار جۇرگىزىلىپ جاتىر، ونىڭ 20-سىندا مونتاجداۋ جۇمىستارى اياقتالۋعا جاقىن. جاڭا ۆەتەريناريالىق پۋنكتتەردىڭ ءبىرى بۇقار جىراۋ اۋدانىنىڭ پەتروۆكا اۋىلىندا ورناتىلدى.
زاماناۋي نىسان اۋىل شارۋاشىلىعى جانۋارلارىن قابىلداپ، قاجەتتى ۆەتەريناريالىق ءىس-شارالاردى جۇرگىزۋگە ارنالعان قۇرال-جابدىقتاردىڭ بارلىعىمەن قامتاماسىز ەتىلگەن.
مۇندا مەڭگەرۋشى مەن ۆەتەريناريالىق سانيتار ەڭبەك ەتەدى. ولار 202 جەكە قوسالقى شارۋاشىلىققا قىزمەت كورسەتەدى.
وسىعان دەيىن پەتروۆكا اۋىلىندا ۆەتەريناريالىق پۋنكت بولماعان.
— ەندى جانۋارلاردى ۆەتەريناريالىق پۋنكتكە اكەلىپ، سول جەردەن بىلىكتى كومەك الۋعا بولادى. مۇندا مالدى ەمدەۋگە جانە اۋرۋلاردىڭ الدىن الۋعا ارنالعان پرەپاراتتار دا ساقتالادى. بيىل وبلىستا وسىنداي 70 نىسان سالۋ جوسپارلانعان، ونىڭ 14-ءى بۇقار جىراۋ اۋدانىندا بوي كوتەرەدى، — دەدى قاراعاندى وبلىسىنىڭ ۆەتەريناريا باسقارماسىنىڭ باسشىسى اماندىق جاكەتاەۆ.
بيىل وبلىستىڭ بىرنەشە اۋدانىندا مودۋلدىك ۆەتەريناريالىق پۋنكتتەر ورناتىلىپ جاتىر.
بۇقار جىراۋ اۋدانىنداعى التى نىساندا — دوسكەي، پەتروۆكا، توعىزقۇدىق، نوۆوۋزەنكا، بايمىرزا جانە گاگارين اۋىلدىق وكرۋگتەرىندە جۇمىستار اياقتالۋعا جاقىن.
نۇرا اۋدانىندا تاعى ءتورت پۋنكت — تاسسۋات، قورعانجار، يندۋسترالنايا جانە دونسكوي اۋىلدىق وكرۋگتەرىندە سالىنىپ جاتىر.
ال وساكاروۆ اۋدانىندا 10 نىساندى اياقتاۋ جوسپارلانعان. ولار پيونەر، وزەرنىي، باتپاقتى جانە سادوۆىي اۋىلدىق وكرۋگتەرىندە، سونداي-اق وساكاروۆ، ەسىل، مارجانكول، نيكولاەۆكا، سۇڭقار جانە قۇندىزدى ەلدى مەكەندەرىندە ورناتىلۋدا.
جالپى، الداعى ەكى جىلدا قاراعاندى وبلىسىندا ۆەتەريناريالىق ينفراقۇرىلىمنىڭ 173 نىسانىن قۇرۋ جوسپارلانعان.
ۆەتەريناريا باسقارماسىنىڭ مالىمەتىنشە، جاڭا پۋنكتتەردىڭ اشىلۋى ماماندارعا اۋىلدىق جەرلەردىڭ وزىندە ساپالى قىزمەت كورسەتۋگە قاجەتتى جاعداي جاساۋعا مۇمكىندىك بەرەدى. بۇل رەتتە شارۋاشىلىق يەلەرى ءۇشىن ۆەتەريناريالىق كومەكتىڭ قولجەتىمدىلىگى ارتىپ، مالعا ۆەتەريناريالىق قىزمەت كورسەتۋ ساپاسى دا جاقسارا تۇسەدى.
