فوتو: قاراعاندى وبلىسىنىڭ پد ءباسپاسوز قىزمەتى
قاراعاندى وبلىسىندا ەسىرتكى قىلمىسىنىڭ الدىن الۋعا باعىتتالعان اۋقىمدى اكتسيا ءوتتى. ءبىر مەزەتتە قاراعاندى، تەمىرتاۋ جانە بالقاش قالالارىندا پوليتسيا قىزمەتكەرلەرى مەن ەرىكتىلەر ەسىرتكى زاتتارىن جارنامالايتىن گراففيتي جازۋلاردى ءوشىردى.
اكتسيانى قاراعاندى وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى ۇيىمداستىردى. ءبىر كۇننىڭ ىشىندە ءۇش قالادا مىڭنان استام زاڭسىز گراففيتي جازۋى جويىلدى. ءىس-شاراعا 200-دەن استام ادام قاتىستى.
بۇل – ەسىرتكى جارناماسىنىڭ تارالۋىنا جول بەرمەۋگە باعىتتالعان جۇيەلى جۇمىستىڭ ءبىر بولىگى. جىل باسىنان بەرى وبلىس اۋماعىندا وسىنداي 92 رەيدتىك ءىس-شارا وتكىزىلىپ، 7 مىڭنان استام گراففيتي جازۋى ءوشىرىلدى.
پوليتسيا قىزمەتكەرلەرى ەسىرتكى جارنامالايتىن جازۋلاردى ءوشىرىپ قانا قويماي، ولاردى قالدىرۋعا قاتىسى بار ادامداردى انىقتاۋ بويىنشا دا جۇمىستار جۇرگىزۋدە.
– بۇگىنگى ءىس-شارانىڭ نەگىزگى ماقساتى – ەسىرتكى زاتتارىن جارنامالايتىن جازۋلاردى جويۋ جانە ولاردىڭ تارالۋىنا جول بەرمەۋ. بۇل جۇمىسقا ەرىكتى جاستاردىڭ بەلسەندى قاتىسىپ وتىرعانى قۋانتادى. جىل باسىنان بەرى 92 رەيد وتكىزىلىپ، 7 مىڭنان استام گراففيتي جازۋى ءوشىرىلدى. سونىمەن قاتار مۇنداي جازۋلاردى سالىپ جاتقان جەرىنەن ءۇش ادام ۇستالدى، – دەدى قاراعاندى وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى قايىرجان توكۋباەۆ.
ونىڭ ايتۋىنشا، گراففيتي جازۋلارىن قالدىرۋ فاكتىلەرى بويىنشا قىلمىستىق جاۋاپكەرشىلىككە تارتىلعان ازاماتتار دا بار.
ماسەلەن، مامىر ايىندا بالقاش قالاسىندا جۇرگىزىلگەن رەيد بارىسىندا ەسىرتكى جارنامالايتىن گراففيتي جازۋىن سالىپ جاتقان 37 جاستاعى قالا تۇرعىنى ۇستالدى. وعان قاتىستى قىلمىستىق ءىس قوزعالىپ، سوت ۇكىمىمەن 1 جىل 6 ايعا باس بوستاندىعىنان ايىرىلدى.
پوليتسيا دەپارتامەنتى ەسىرتكى قىلمىسىنىڭ الدىن الۋ باعىتىنداعى جۇمىستاردى تۇراقتى تۇردە جالعاستىرادى. بۇل رەتتە ىشكى ىستەر ورگاندارىنىڭ نەگىزگى مىندەتتەرىنىڭ ءبىرى – ەسىرتكىنىڭ زاڭسىز اينالىمىنا عانا ەمەس، ونى ناسيحاتتاۋ مەن تاراتۋعا ىقپال ەتەتىن كەز كەلگەن ارەكەتكە دەر كەزىندە توسقاۋىل قويۋ.
«زاڭ مەن ءتارتىپ» قاعيداتى – قاۋىپسىز ورتانى قالىپتاستىرۋدى جانە قۇقىق بۇزۋشىلىقتىڭ الدىن الۋدى تالاپ ەتەدى. وسى باعىتتا پوليتسيا قىزمەتكەرلەرى ەرىكتىلەرمەن جانە قوعام بەلسەندىلەرىمەن بىرلەسىپ، ەسىرتكى جارنامالايتىن جازۋلاردى انىقتاۋ، جويۋ جانە ولاردى قالدىرعان ادامداردى جاۋاپكەرشىلىككە تارتۋ جۇمىستارىن كۇشەيتۋدە.
پوليتسيا تۇرعىنداردى قوعامدىق ورىندارداعى كۇماندى جازۋلارعا بەيجاي قاراماۋعا جانە ولار تۋرالى دەرەۋ پوليتسياعا حابارلاۋعا شاقىرادى.
