پرەمەر-ءمينيستردىڭ ورىنباسارى قانات بوزىمباەۆ قاراعاندى وبلىسىنا بارعان ءىسساپارى بارىسىندا «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىنىڭ جۇزەگە اسىرىلۋىن جانە تىرشىلىكتى قامتاماسىز ەتۋ نىساندارىنىڭ الداعى جىلىتۋ ماۋسىمىنا دايىندىعىن تەكسەردى.
نىسانداردى ارالاۋ بارىسىندا ۆيتسە-پرەمەر تەمىرتاۋ مەن قاراعاندى قالالارىندا بولىپ، جىلۋ ماگيسترالدارىنىڭ، سۋ تازارتۋ قۇرىلىستارىنىڭ، ەلەكتر جەلىلەرى مەن قوسالقى ستانسالاردىڭ جوندەۋ جۇمىستارىمەن تانىستى. بۇل ينفراقۇرىلىمنىڭ باسىم بولىگى 1960-1990 جىلدارى پايدالانۋعا بەرىلگەن، ال كەيبىر نىسانداردىڭ توزۋ دەڭگەيى 70-80%-عا جەتكەن.
تەمىرتاۋدا نەگىزگى جۇمىس جىلۋ جەلىلەرىن جاڭارتۋعا باعىتتالعان. جم-3 جىلۋ ماگيسترالىنىڭ 8,27 شاقىرىم قۇبىرى قايتا جاڭارتىلىپ جاتىر. بۇل جەلى 60 مىڭعا جۋىق تۇرعىندى نەمەسە 312 كوپقاباتتى ءۇي مەن 22 الەۋمەتتىك نىساندى قامتاماسىز ەتىپ وتىر. ماگيسترال 1967 جىلدان بەرى پايدالانىلىپ كەلەدى، توزۋ دەڭگەيى 75%-عا جەتكەن، ال سوڭعى بەس جىلدا مۇندا 38 اقاۋ تىركەلگەن.
سونداي-اق ۆيتسە-پرەمەرگە بىلتىر اياقتالعان جوبا – جم-2ا جىلۋ ماگيسترالىنىڭ 3,64 شاقىرىمىن جوندەۋ جۇمىستارىنىڭ ناتيجەسى كورسەتىلدى. بۇگىنگى تاڭدا بۇل ماگيسترال 7,2 مىڭنان استام ابونەنتتى جىلۋمەن قامتاماسىز ەتۋدە. بۇرىن توزۋ دەڭگەيى 75%-عا جەتكەن جانە سوڭعى بەس جىلدا 31-گە جۋىق اقاۋ شىققان بۇل جەلىدە «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىنىڭ ناتيجەسىندە العاش رەت جىلىتۋ ماۋسىمى ەشقانداي اپاتسىز ءارى اجىراتۋسىز ءوتتى.
بۇدان ءارى پرەمەر-ءمينيستردىڭ ورىنباسارىنىڭ جۇمىس ساپارى قاراعاندى قالاسىندا جالعاسىپ، وندا سۋمەن جابدىقتاۋ جۇيەسىنە ەرەكشە نازار اۋدارىلدى. مۇندا 50 جىلدان استام ۋاقىت بويى كۇردەلى جوندەۋ كورمەگەن «قاراعاندى سۋ» جشس-ءنىڭ سۋ تازارتۋ كەشەنىن قايتا جاڭارتۋ جۇمىستارى جۇرگىزىلىپ جاتىر. نىساننىڭ توزۋ دەڭگەيى 80%-عا جەتكەن، تەك سوڭعى ءۇش جىلدىڭ وزىندە مۇندا 89 اپات بولعان.
بۇل كەشەننىڭ ۇزدىكسىز جۇمىس ىستەۋى قاراعاندى، تەمىرتاۋ قالالارى مەن اقتاس كەنتىنىڭ 695 مىڭعا جۋىق تۇرعىنىن، سونداي-اق قاراعاندى جەو-3 ورتالىعىن اۋىزسۋمەن قامتاماسىز ەتۋگە تىكەلەي اسەر ەتەدى. قازىرگى ۋاقىتتا مۇندا نەگىزگى قۇرىلىستار مەن تەحنولوگيالىق جابدىقتار جاڭارتىلىپ جاتىر. جوبانىڭ قۇنى – 15,1 ملرد تەڭگە.
سونداي-اق قانات بوزىمباەۆقا وبلىستىڭ ەلەكتر جەلىلەرىن جاڭعىرتۋ جۇمىستارى تانىستىرىلدى. وڭىردە ەلەكتر بەرۋ جەلىلەرى مەن قوسالقى ستانسالاردى قايتا جاڭارتۋ بويىنشا التى جوبا ازىرلەنگەن. ونىڭ تورتەۋى قازىردىڭ وزىندە جۇزەگە اسىرىلىپ جاتىر: 110 كۆ ەكى جەلى مەن ەكى قوسالقى ستانسا جاڭارتىلۋدا. بۇل جۇمىستار جەلىلەردىڭ توزۋىن ازايتۋعا جانە ايماقتى ەلەكترمەن قامتاماسىز ەتۋ سەنىمدىلىگىن ارتتىرۋعا باعىتتالعان.
جۇمىس ساپارى قاراعاندىداعى م-3 جىلۋ ماگيسترالىن ارالاۋمەن اياقتالدى. وندا ۆيتسە-پرەمەر قالانىڭ ەكى ءىرى جىلۋ ماگيسترالىن قايتا جاڭارتۋ بارىسىمەن تانىستى. م-3 جەلىسىندە 2,4 شاقىرىم قۇبىر جاڭارتىلىپ جاتىر. مۇنداعى ماگيسترال 183 مىڭعا جۋىق تۇرعىندى، 817 كوپقاباتتى ءۇيدى جانە 611 الەۋمەتتىك-مادەني نىساندى جىلۋمەن قامتاماسىز ەتەدى. قايتا جاڭارتۋدان كەيىن قولدانىستاعى جۇيەنىڭ تيىمدىلىگى ارتىپ، جاڭا تۇرعىن ۇيلەردى، الەۋمەتتىك نىساندار مەن بيزنەس نىساندارىن قوسۋعا مۇمكىندىك بولادى.
سونىمەن قاتار م-2 جىلۋ ماگيسترالى مەن №2 سورعى ستانساسىن قايتا جاڭارتۋ جۇمىستارى جالعاسۋدا. ناتيجەسى قازىردىڭ وزىندە ايقىن: جىلىتۋ ماۋسىمىنداعى اقاۋلار سانى 36-دان ەكىگە دەيىن ازايدى. جوبا تولىق اياقتالعاننان كەيىن قاراعاندىنىڭ ورتالىق بولىگىندەگى 64 مىڭعا جۋىق تۇرعىن تۇراقتى جىلۋمەن قامتاماسىز ەتىلەدى.
وڭىردەگى جۇمىستىڭ بارىسىن باعالاي كەلە، قانات بوزىمباەۆ قازىرگى باستى مىندەت – ەڭ توزىعى جەتكەن ۋچاسكەلەردى ۋاقىتىندا جاڭارتىپ، كوممۋنالدىق ينفراقۇرىلىمدى جىلىتۋ ماۋسىمىنا تولىق دايىنداۋ ەكەنىن اتاپ ءوتتى.
«قاراعاندى وبلىسىندا جۇمىس جاقسى قارقىمەن ءجۇرىپ جاتىر: جىلۋ مەن ەلەكتر جەلىلەرىنىڭ ەڭ قاتتى زاقىمدالعان ءارى توزىعى جەتكەن بولىكتەرى اۋىستىرىلۋدا. ءوڭىردىڭ مىندەتى – بارلىق قاجەتتى جۇمىستى 15 قىركۇيەككە دەيىن اياقتاپ، گيدراۆليكالىق سىناقتاردى وتكىزۋ جانە جىلىتۋ ماۋسىمىنا ءجۇز پايىز دايىندىقپەن كىرۋ. تۇپتەپ كەلگەندە، مۇنىڭ ءبارى حالىق ءۇشىن جاسالىپ جاتىر. جىلۋ، سۋ جانە ەلەكتر قۋاتى – ادام كۇندەلىكتى پايدالاناتىن تىرشىلىك كوزدەرى. سوندىقتان ءبىزدىڭ ماقساتىمىز – بۇل قىزمەتتەردىڭ ۇزدىكسىز ءارى ءتيىمدى جۇمىس ىستەۋىن قامتاماسىز ەتىپ، حالىقتىڭ تۇرمىس ساپاسىن ارتتىرۋ», — دەدى قانات بوزىمباەۆ.
قاراعاندى وبلىسىنداعى جوبالاردى جۇزەگە اسىرۋ كەزىندە وتاندىق وندىرۋشىلەردىڭ ونىمدەرى بەلسەندى تۇردە قولدانىلىپ كەلەدى. ساپار بارىسىندا تانىستىرىلعان نىسانداردىڭ باسىم بولىگىندە قازاقستاندىق ونىمدەر 95%-دان اسادى، ال كەيبىر جوبالار بويىنشا 100%-عا جەتەدى.
ساپار قورىتىندىسى بويىنشا قانات بوزىمباەۆ قۇرىلىس-مونتاجداۋ جۇمىستارىنىڭ مەرزىمى مەن ساپاسىن قاتاڭ ساقتاۋدى تاپسىردى. جىلىتۋ ماۋسىمىنىڭ اپاتسىز وتۋىنە تىكەلەي اسەر ەتەتىن نىساندارعا ەرەكشە نازار اۋدارىلۋى ءتيىس. وبلىس اكىمدىگى مەن جاۋاپتى ۇيىمدارعا بەكىتىلگەن كەستەدەن كەشىكپەۋ جانە جاڭعىرتىلاتىن ينفراقۇرىلىمنىڭ كۇزگى-قىسقى كەزەڭگە تولىق دايىن بولۋىن قامتاماسىز ەتۋ تاپسىرىلدى.
