الماتى اكىمى دارحان ساتىبالدى تۇرعىن ءۇي جاعدايىن جاقسارتۋعا مۇقتاج، باسپانا كەزەگىندە تۇرعان ازاماتتارعا جاڭا پاتەرلەردىڭ كىلتىن تابىستادى.
تۇرعىن ءۇيدى ءبولۋدىڭ ەكىنشى كەزەڭى اياسىندا «التىناي» تۇرعىن ءۇي كەشەنىندەگى 210 پاتەر قالا تۇرعىندارىنىڭ يگىلىگىنە بەرىلدى.
ءىس-شارا بارىسىندا قالا اكىمى تۇرعىن ءۇيدىڭ قولجەتىمدىلىگىن ارتتىرۋ جانە الەۋمەتتىك ادىلدىكتى قامتاماسىز ەتۋ مەملەكەت باسشىسى قاسىم-جومارت توقاەۆتىڭ الەۋمەتتىك ساياساتىنداعى ماڭىزدى باعىتتاردىڭ ءبىرى ەكەنىن اتاپ ءوتتى.
«مەملەكەتتىك قولداۋ ەڭ الدىمەن شىن مانىندە كومەككە مۇقتاج ازاماتتارعا باعىتتالۋعا ءتيىس. سونىمەن بىرگە تۇراقتى تابىسى بار ەڭبەك ەتەتىن تۇرعىندارعا ەڭبەگىنىڭ ناتيجەسىندە باسپانا الۋعا مۇمكىندىك جاساۋ ماڭىزدى»، – دەدى دارحان ساتىبالدى.
الماتى اكىمدىگى «وتباسى بانكى» اق-مەن بىرلەسىپ، 4 مىڭنان استام پاتەردى كەزەڭ-كەزەڭىمەن ءبولۋدى جالعاستىرۋدا. ءبىرىنشى كەزەڭ اياسىندا 885 پاتەر بەرىلسە، ەكىنشى كەزەڭدە تاعى 1 832 پاتەر ۇلەستىرىلەدى. سونىمەن قاتار «جۇمىس ىستەيتىن جاستار» باعدارلاماسى اياقتالعاننان كەيىن بوساپ قالعان 1 مىڭنان استام پاتەر تۇرعىن ءۇي كەزەگىندە تۇرعان ازاماتتارعا بەرىلەدى. تاعى 594 پاتەر نەسيە شارتتارىمەن ۇسىنىلادى.
پاتەرلەردى ءبولۋ بويىنشا كونكۋرستار قىركۇيەك ايىنىڭ باسىنان باستاپ كەزەڭ-كەزەڭىمەن وتكىزىلەدى. بۇل رەتتە ازاماتتاردىڭ تۇرعىن ءۇي كەزەگىنە قويىلعان كۇنى ەسكەرىلەدى. بۇل باسپانانى ءبولۋدىڭ جۇيەلىلىگى مەن اشىقتىعىن قامتاماسىز ەتۋگە مۇمكىندىك بەرەدى.
قولدانىستاعى مەملەكەتتىك قولداۋ تەتىكتەرى اياسىندا تابىسى تومەن ازاماتتارعا جالدامالى تۇرعىن ءۇي بەرىلەدى. ال تۇراقتى تابىسى مەن تولەم قابىلەتى بار تۇرعىندارعا نەسيەگە بەرىلەتىن تۇرعىن ءۇي جانە جەڭىلدەتىلگەن يپوتەكالىق باعدارلامالار قولجەتىمدى.
