الماتى وبلىسىندا تۋريستەر مىنگەن اۆتوبۋس جول اپاتىنا ۇشىراپ، سالدارىنان ءبىر ادام قازا تاپتى. بۇل تۋرالى وبلىستىق پوليتسيا دەپارتامەنتىنىڭ باستىعى باۋىرجان الەنوۆ ايتتى، دەپ حابارلايدى «ادىرنا» ءتىلشىسى.
قايعىلى وقيعا 5 قازان كۇنى بولعان.
«كەگەن اۋدانى ساتى اۋىلدىق وكرۋگى اۋماعىندا «قايىڭدى-ساتى» تاۋلى اۆتوجولىنىڭ 9-شاقىرىمىندا 47 جاستاعى اۆتوبۋس جۇرگىزۋشىسى قارسى قوزعالىس جولاعىنا شىعىپ، 1997 جىلعى جۇرگىزۋشى ايداپ كەلە جاتقان «ۋاز» اۆتوكولىگىمەن سوقتىعىسقان. اتالعان دەرەكتى كەگەن اۋداندىق پوليتسيا ءبولىمى قر قىلمىستىق كودەكسىنىڭ 345-بابىنىڭ 3-ءبولىمى بويىنشا تىركەدى. جول اپاتى سالدارىنان 36 جاستاعى جولاۋشى وقيعا ورنىندا قازا تاپتى. سونىمەن قاتار، ءتۇرلى دەنە جاراقاتتارىمەن اۋرۋحاناعا 6 ادام جەتكىزىلدى»،—دەپ ءتۇسىندىردى باۋىرجان الەنوۆ.قازىرگى ۋاقىتتا وسى جول-كولىك وقيعاسىنىڭ بارلىق ءمان-جايلارىن وبەكتيۆتى زەرتتەۋگە باعىتتالعان ساراپتاما تاعايىنداۋمەن قاجەتتى تەرگەۋ ارەكەتتەرى جۇرگىزىلۋدە. اۆتوبۋس جۇرگىزۋشىسى كەگەن اۋدانى پوليتسيا دەپارتامەنتى ۋاقىتشا ۇستاۋ يزولياتورىنا قاماققا الىندى.
ۇقساس جاڭالىقتار
