جۇمىسشى ماماندىقتار جىلى اياسىندا ەلدىڭ وندىرىستىك ورتالىعى — جەزقازعان قالاسىندا ءوڭىردىڭ ەڭ كونە تەحنيكالىق وقۋ ورىندارىنىڭ ءبىرى جەزقازعان جوعارى پوليتەحنيكالىق كوللەدجىنە ارنالعان ءباسپاسوز تۋرى ءوتتى.
ءىس-شارانىڭ ماقساتى — تەحنيكالىق جانە كاسىپتىك ءبىلىم بەرۋدىڭ جاستارعا تابىستى مانساپقا جول اشاتىنىن كورسەتۋ. 72 جىلدىق تاريحى بار بۇل ءبىلىم ورداسى — ۇلىتاۋ ءوڭىرىنىڭ نەگىزگى كادر دايارلاۋ ورتالىعى. مۇندا ستۋدەنتتەر تەك جۇمىسشى ماماندىعىن مەڭگەرىپ قانا قويماي، زاماناۋي وندىرىستىك تاجىريبە الىپ، ەڭبەك نارىعىندا سۇرانىسقا يە مامان بولىپ شىعادى.
كوللەدج ميسسياسى — ءبىلىم بەرۋ، زەرتتەۋ جانە يننوۆاتسيالىق ورتانى قالىپتاستىرا وتىرىپ، حالىقارالىق ستاندارتتارعا ساي ساپالى كاسىپتىك وقىتۋدى قامتاماسىز ەتۋ.
ءباسپاسوز تۋرى اياسىندا قاتىسۋشىلار كوللەدجدىڭ 3 كورپۋسىن، 32 ورىندىق جاتاقحاناسىن، سپورت كەشەنىن، اسحاناسىن جانە «Building & Energy» قۇزىرەتتىلىك ورتالىعىن ارالادى. «جاس مامان» جوباسى اياسىندا جابدىقتالعان دانەكەرلەۋ، سلەسارلىق، ەلەكترمونتاج، ساندىك سىلاق، اعاش وڭدەۋ جانە وزگە دە شەبەرحانالار جۇمىسىمەن تانىسىپ، «قازاقمىس» كورپوراتسياسىنىڭ وندىرىستىك الاڭىندا ءدۋالدى وقىتۋ پروتسەسىن كوردى. كوللەدجدىڭ تابىستى تۇلەكتەرىمەن جۇزدەستى.
كوللەدجدە مەتاللۋرگيا، بايىتۋ، IT, اۆتوماتتاندىرۋ، قۇتقارۋ ءىسى، ەنەرگەتيكا جانە قۇرىلىس باعىتتارى بويىنشا 11 وزەكتى ماماندىق وقىتىلادى. 23 وقۋ كابينەتى، 12 زەرتحانا، 8 شەبەرحانا زاماناۋي تالاپتارعا ساي جابدىقتالعان. 61 بىلىكتى وقىتۋشىنىڭ 19-ى WorldSkills ستاندارتتارى بويىنشا دايارلىقتان وتكەن. 2024–2025 وقۋ جىلىندا كوللەدج بازاسىندا وتكەن «WorldSkills Ulytau 2025» چەمپيوناتىندا ستۋدەنتتەر بىرنەشە قۇزىرەتتىلىك بويىنشا جۇلدەلى ورىندارعا يە بولدى. ءدۋالدى وقىتۋ جانە وندىرىستىك تاجىريبە «قازاقمىس»، Kazakhmys Energy جانە ءوڭىردىڭ 15-تەن استام كاسىپورنىندا جۇزەگە اسىرىلادى. وقىتۋشىلار Skills Enbek پلاتفورماسىندا سۇرانىسقا يە داعدىلاردى ۇيرەتەتىن اۆتورلىق ونلاين كۋرستار ازىرلەۋدى قولعا العان.
كاسىپتىك باعدار مەن مانساپتىق قولداۋ:
كوللەدج «مانساپ كومپاسى» پلاتفورماسى ارقىلى كاسىبي باعدار بەرىپ، «اشىق ەسىك» كۇندەرى، ماماندىقتار جارمەڭكەلەرى، فورۋمدار مەن كەزدەسۋلەر ارقىلى تالاپكەرلەر مەن تۇلەكتەرگە ناقتى جۇمىسقا ورنالاسۋ مۇمكىندىكتەرىن ۇسىنادى.
كوللەدجدىڭ ىرگەتاسى 1953 جىلى قالانعان. 2020 جىلى «جوعارى كوللەدج» مارتەبەسىن الىپ، «جاس مامان» رەسپۋبليكالىق جوباسىنىڭ گرانت يەگەرى اتاندى. بۇگىندە زاماناۋي تەحنيكالىق بازاعا، جوعارى بىلىكتى پەداگوگيكالىق قۇرامعا يە جانە ءوڭىردىڭ الەۋمەتتىك-ەكونوميكالىق دامۋىنا بەلسەندى ۇلەس قوسىپ وتىر.
