2025 جىلى «وتباسى بانكتىڭ» بىرقاتار قىزمەتكەرىنە قاتىستى سىبايلاس جەمقورلىق سيپاتىنداعى فاكتىلەر انىقتالدى، دەپ حابارلايدى "ادىرنا" ۇلتتىق پورتالى.
بۇل تۋرالى بانكتىڭ قازاقستان قور بيرجاسىنا (KASE) ۇسىنعان جىلدىق ەسەبىندە ايتىلعان.
بانك مالىمەتىنشە، كەيبىر قىزمەتكەرلەر كليەنتتەردىڭ، ريەلتورلاردىڭ، جەكە سوت ورىنداۋشىلارى مەن نوتاريۋستاردىڭ مۇددەسىن ىلگەرىلەتۋ، سونداي-اق تۇرعىن ءۇي كەزەگىندەگى ورىنداردى جىلجىتۋ ءۇشىن زاڭسىز سىياقى العان. سونىمەن قاتار بانكتىڭ فيليالدارىنىڭ بىرىندە قىزمەتكەر كليەنتتەردىڭ نەسيە قابىلەتتىلىگىن راستايتىن جالعان تابىس تۋرالى قۇجاتتار دايىنداپ، ولاردى كرەديتتىك وتىنىمدەرگە تىركەگەنى انىقتالعان.
اتالعان قىزمەتكەرلەرمەن ەڭبەك شارتتارى جۇمىس بەرۋشىنىڭ باستاماسىمەن، سەنىمنىڭ جوعالۋىنا بايلانىستى بۇزىلعان.
بانك انىقتالعان فاكتىلەر بويىنشا قۇقىق قورعاۋ ورگاندارىنا ءتيىستى وتىنىشتەر جولداعان. قازىرگى ۋاقىتتا بىرقاتار قىلمىستىق ءىس بويىنشا سوتقا دەيىنگى تەرگەۋ جۇرگىزىلىپ جاتىر. بانك ەسەبىندە اتالعان ىستەر بويىنشا تەرگەۋدىڭ ناتيجەلەرى تۋرالى قوسىمشا مالىمەت كەلتىرىلمەگەن.
