اقتوبە وبلىسىنىڭ پروكۋراتۋراسى حابارلاعانداي، وڭىردە 12 پروبلەمالىق ۇلەستىك قۇرىلىس نىسانى انىقتالعان. بۇل نىساندار بويىنشا 797 جابىرلەنۋشى تىركەلگەن، ال كەلتىرىلگەن جالپى زالال كولەمى 6,1 ملرد تەڭگە، دەپ حابارلايدى "ادىرنا".
«الاشوردا-1» تۇرعىن ءۇي كەشەنى مەن «Aviator Premium» قۇرىلىس جوبالارىنىڭ باسشىلارى الاياقتىق جولمەن 200-دەن استام ۇلەسكەردىڭ قاراجاتىن يەمدەنىپ، 1,8 ملرد تەڭگەدەن استام شىعىن كەلتىرگەن.
پروكۋراتۋرا قابىلداعان شارالاردىڭ ناتيجەسىندە بيىل 7 قۇرىلىس كومپانياسىنىڭ باسشىلارى 11 نىسان بويىنشا قىلمىستىق جاۋاپكەرشىلىككە تارتىلدى.
سوت ۇكىمىمەن «Safina.kz» جانە «سترويسەرۆيسرەگيون» تۇرعىن ءۇي كەشەندەرىنىڭ قۇرىلىس سالۋشىلارى 300-دەن استام ۇلەسكەردىڭ قاراجاتىن زاڭسىز يەمدەنگەنى ءۇشىن 10 جىلعا باس بوستاندىعىنان ايىرىلدى.
سونىمەن قاتار پروكۋراتۋرا ورگاندارى ازاماتتىق ىستەر بويىنشا 413 ۇلەسكەردىڭ مۇددەسىن قورعاپ، تۇرعىن ءۇي ساتۋ-ساتىپ الۋ شارتتارىن جارامسىز دەپ تانۋ جانە مۇلىكتى قايتارۋ تۋرالى 8 تالاپ-ارىز بەرگەن. ونىڭ ىشىندە 6 تالاپ-ارىز قاناعاتتاندىرىلىپ، 285 ۇلەسكەردىڭ قۇقىعى قورعالدى. ال 3 نىسان بويىنشا 128 ۇلەسكەردىڭ ىستەرى سوت قاراۋىندا.
ايماقتىق پروكۋراتۋرا تۇرعىن ءۇي قۇرىلىسى كەزىندە ازاماتتاردىڭ قاراجاتىن زاڭسىز تارتۋ دەرەكتەرىن انىقتاۋ ءۇشىن تۇراقتى مونيتورينگ جۇرگىزىپ وتىرادى. بارلىق پروبلەمالىق نىساندار وبلىس پروكۋراتۋراسىنىڭ ەرەكشە باقىلاۋىندا.
