وڭتۇستىك كورەيادا زاڭسىز جۇمىس ىستەپ جۇرگەن قازاقستاندىقتار اقپان ايىنىڭ سوڭىنا دەيىن ەلدەن ەرىكتى تۇردە كەتە الادى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى، دەپ حابارلايدى «ادىرنا» ءتىلشىسى.
«بۇعان دەيىن حابارلانعانداي، ەرىكتى تۇردە ەلدەن شىعۋ باعدارلاماسىنىڭ ۋاقىتشا شەڭبەرىن كەڭەيتۋ جونىندەگى ۋاعدالاستىقتار 2025 جىلى وتكەن زاڭسىز كوشى-قوندى ازايتۋ جانە ازاماتتارىمىزدىڭ قۇقىقتارىن قورعاۋ ماسەلەلەرى بويىنشا كەلىسسوزدەر بارىسىندا مينيسترلىك پەن كورەيانىڭ ادىلەت مينيسترلىگى اراسىندا قول جەتكىزىلگەن. بۇل شارالار قۇقىقتىق سالدارلاردى جەڭىلدەتۋگە جانە ءوز مارتەبەسىن رەتتەۋگە دايىن ادامداردى قولداۋعا باعىتتالعان. باعدارلاما قىلمىستىق قۇقىقبۇزۋشىلىق جاساعان، ماجبۇرلەپ شىعارۋ شاراسىنا جاتاتىن، سونداي-اق 2025 جىلعى 1 جەلتوقساننان كەيىن زاڭسىز مارتەبەگە تۇسكەن شەتەلدىكتەرگە قولدانىلمايدى»،- دەلىنگەن حابارلامادا.
باعدارلاماعا قاتىسۋ ءۇشىن تولقۇجات، ءوز ەركىمەن كەتۋ تۋرالى ءوتىنىش جانە اۋە بيلەتى قاجەت. الدىن الا حابارلاما كورەيا رەسپۋبليكاسىنىڭ يمميگراتسيا كەڭسەلەرى ارقىلى ۇشۋ كۇنىنە دەيىن 15-تەن 3 كۇنگە دەيىنگى مەرزىمدە بەرىلەدى.
مينيسترلىك قازاقستاندىقتاردى شەتەلدە تەك زاڭدى نەگىزدە جۇمىسقا ورنالاسۋعا شاقىرادى. بۇل زاڭسىز كوشى-قون، ەلدەن شىعارىپ جىبەرۋ، ايىپپۇلدار، قۇقىقتىق شەكتەۋلەر جانە ەڭبەك قاناۋى سياقتى تاۋەكەلدەردىڭ الدىن الۋعا مۇمكىندىك بەرەدى.
