قازاقستاننىڭ ەكولوگيا جانە تابيعي رەسۋرستار مينيسترلىگى «تەڭىزشەۆرويل» كومپانياسىن وندىرىستىك قالدىقتاردى ساقتاۋ تالاپتارىن بۇزدى دەپ ايىپتادى، دەپ حابارلايدى "ادىرنا" ۇلتتىق پورتالى.
بۇل تۋرالى Bloomberg اگەنتتىگى حابارلادى.
مينيسترلىكتىڭ مالىمەتىنشە، شىلدە ايىندا اتىراۋ وبلىسى بويىنشا ەكولوگيا دەپارتامەنتى تەڭىز كەن ورنىندا جوسپاردان تىس تەكسەرۋ جۇرگىزگەن. تەكسەرۋ ناتيجەسىندە كاسىپورىندا ەكولوگيالىق رۇقساتتا بەلگىلەنگەن ليميتتەرسىز قالدىقتاردىڭ جينالۋىنا جول بەرىلگەنى انىقتالعان. الايدا «تەڭىزشەۆرويل» تەكسەرۋ قورىتىندىسىمەن كەلىسپەيتىنىن مالىمدەپ، سوتقا دەيىنگى شاعىمدانۋ ءراسىمىن باستاعان. وسىعان بايلانىستى كومپانيانى اكىمشىلىك جاۋاپكەرشىلىككە تارتۋ ماسەلەسى شاعىم قارالعانعا دەيىن ۋاقىتشا توقتاتىلدى.
كومپانيا وكىلدەرى ءوز قىزمەتىن ۋاكىلەتتى مەملەكەتتىك ورگاندار بەرگەن رۇقساتتار مەن قولدانىستاعى زاڭناما تالاپتارىنا سايكەس جۇزەگە اسىرىپ جاتقانىن اتاپ ءوتتى. بۇل – «تەڭىزشەۆرويلعا» قاتىستى العاشقى ەكولوگيالىق داۋ ەمەس. بيىل ءساۋىر ايىندا كومپانيا اتموسفەراعا لاستاۋشى زاتتاردى بەلگىلەنگەن نورمادان ارتىق شىعارعانى ءۇشىن 53,7 ميلليون تەڭگە كولەمىندە ايىپپۇل تولەگەن.
سوڭعى جىلدارى قازاقستان حالىقارالىق مۇناي كونسورتسيۋمدارىنا قويىلاتىن ەكولوگيالىق تالاپتاردى كۇشەيتىپ كەلەدى. اتاپ ايتقاندا، 2023 جىلى قاشاعان كەن ورنىن يگەرىپ جاتقان North Caspian Operating Company (NCOC) كونسورتسيۋمىنا كۇكىرتتى نورمادان تىس ساقتاعانى ءۇشىن كوپ ميلليارد دوللارلىق تالاپ قويىلعان. قازىرگى ۋاقىتتا بۇل ءىس سوتتا قارالىپ جاتىر.
