«تەڭىزشەۆرويل» كاسپي قۇبىر كونسورتسيۋمى (كقك) ارقىلى مۇناي تيەۋدىڭ ۋاقىتشا توقتاتىلۋىنا بايلانىستى مۇناي ەكسپورتىن گرۋزياداعى باتۋمي پورتى ارقىلى قايتا باستادى، دەپ حابارلايدى "ادىرنا" ءتىلشىسى Reuters-كە سىلتەپ.
Reuters اگەنتتىگىنىڭ مالىمەتىنشە، كومپانيا تەڭىز كەن ورنىنان وندىرىلگەن شامامەن 20 مىڭ توننا مۇنايدى تەمىرجول تسيستەرنالارى ارقىلى باتۋمي پورتىنا جونەلتكەن. وندا مۇناي تانكەرلەرگە تيەلىپ، قارا تەڭىز ارقىلى تۇركياعا جەتكىزىلەدى. كومپانيا بۇل اقپاراتقا قاتىستى ازىرگە رەسمي تۇسىنىكتەمە بەرگەن جوق.
كقك قازاقستان مۇناي ەكسپورتىنىڭ 80 پايىزدان استامىن قامتاماسىز ەتەدى. الايدا 30 شىلدەدە نوۆوروسسيسك ماڭىنداعى تەڭىز تەرمينالىندا مۇناي تيەۋ دروندار شابۋىلىنا بايلانىستى ۋاقىتشا توقتاتىلدى.
وسىعان بايلانىستى قازاقستاننىڭ ەنەرگەتيكا مينيسترلىگى جاعدايعا قاتىستى پىكىر ءبىلدىردى. ۆەدومستۆو كقك جۇمىسىنىڭ تولىق توقتاتىلۋى تۋرالى اقپاراتتىڭ شىندىققا سايكەس كەلمەيتىنىن مالىمدەدى.
مينيسترلىكتىڭ حابارلاۋىنشا، 31 شىلدەدە مۇناي قۇبىرىنىڭ جۇمىسى ۋاقىتشا توقتاتىلعانىمەن، جۇك جونەلتۋشىلەردەن مۇناي قابىلداۋ جانە رەزەرۆۋارلاردى تولتىرۋ جالعاسىپ جاتىر. 1 تامىزدان باستاپ تاۋلىگىنە شامامەن 100 مىڭ توننا مۇناي قابىلدانۋدا. تاسىمال كولەمىن ودان ءارى ۇلعايتۋ تەڭىز تەرمينالىندا تانكەرلەردىڭ ۋاقىتىلى تيەۋگە قويىلۋىنا بايلانىستى بولادى.
ەنەرگەتيكا مينيسترلىگى قازىرگى ۋاقىتتا كاسپي قۇبىر كونسورتسيۋمى جانە جۇك جونەلتۋشىلەرمەن تۇراقتى بايلانىستا بولىپ، جاعدايدى باقىلاۋدا ۇستاپ وتىرعانىن حابارلادى.
