شىعىس قازاقستان وبلىسىنىڭ اكىمىنىڭ ايتۋىنشا، ەكولوگيالىق ماسەلەنى شەشۋ ءۇشىن ارنايى باعدارلاما ازىرلەنگەن، دەپ حابارلايدى قازاقپارات ءتىلشىسى.
«ءبىزدىڭ پروبلەمالارىمىزدىڭ بىرقاتارى – ەسكى تەحنولوگيالارعا بايلانىستى. ەشكىمدى قورعاپ وتىرعان جوقپىن. شىنىمدى ايتايىن: راسىندا دا، ءبىزدىڭ زاۋىتتارداعى تەحنولوگيالىق پروتسەسستەر ۇزدىك بولعان جوق. سول سەبەپتى، ولاردىڭ سالدارىن كورىپ وتىرمىز. ەكىنشىدەن، ول تەحنولوگيالاردى وزگەرتۋگە بولا ما؟ ابدەن بولادى. ول ماسەلەمەن اينالىسىپ جاتىرمىز. قاسىم-جومارت كەمەلۇلىنىڭ (توقاەۆ - اۆت) تاپسىرماسىمەن ارنايى باعدارلاما ازىرلەندى. ول قازىرگى ۋاقىتتا ەكولوگيا، گەولوگيا جانە تابيعي رەسۋرستار مينيسترلىگىنىڭ قاراۋىندا جاتىر»، - دەدى دانيال احمەتوۆ وكق-دا وتكەن ءباسپاسوز ءماسليحاتىندا.
ايماق باسشىسىنىڭ ايتۋىنا قاراعاندا، سوڭعى 5 جىلدا ەكولوگيالىق پروتسەستەردى دامىتۋعا 27 ملرد تەڭگە اۋدارىلعان.
«ونىڭ 12 ملرد تەڭگەسىن قازمىرىش، 4,1 ملرد تەڭگەسىن كومىر-ەلەكتر ستانسالارى بەرىپ وتىر. نەگە قول جەتكىزدىك؟ سوڭعى 5 جىلدا اۋاعا شىعارىلاتىن قالدىق كورسەتكىشىن ازايتتىق. مەن جوعارىدا اتاعان باعدارلاما تەڭدەسسىز سانالادى. ازىرگە العا شىعىپ، ول تۋرالى كەڭىرەك ايتپاي تۇرا تۇرايىن. مينيسترلىكتىڭ ساراپتاماسى كەلگەننەن كەيىن تولىققاندى جاۋابىن بەرەمىن»، - دەدى ول.
«ادىرنا» پورتالى
