اسا ءىرى مولشەردەگى الاياقتىق جاسادى دەگەن كۇدىكتى گرۋزيادان ەكستراديتسيالاندى. بۇل تۋرالى 6 تامىزدا باس پروكۋراتۋرانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«بۇگىن باس پروكۋراتۋرا مەن ىشكى ىستەر مينيسترلىگى ينتەرپولىنىڭ قىزمەتكەرلەرى گرۋزيادان اسا ءىرى مولشەردەگى الاياقتىق جاسادى دەگەن كۇدىكپەن قازاقستان رەسپۋبليكاسىنىڭ ازاماتىن ەكستراديتسيالادى. ول 2021 جىلعى قاڭتار مەن 2022 جىلعى اقپان ارالىعىندا اتىراۋ قالاسىندا كيپردان پاتەر ساتىپ الۋعا جاردەم كورسەتەمىن دەگەن سىلتاۋمەن، بىرنەشە اقشالاي اۋدارىم ارقىلى، قازاقستان رەسپۋبليكاسىنىڭ ازاماتشاسىنىڭ 100 ميلليون تەڭگەدەن استام اقشالاي قاراجاتىن الاياقتىق جولمەن جىمقىرىپ كەتكەن دەپ كۇدىكتەلۋدە»،–دەلىنگەن حابارلامادا.
قىلمىس جاساعاننان كەيىن كۇدىكتى جاسىرىنىپ، وسىعان بايلانىستى حالىقارالىق ىزدەۋگە جاريالانعان.
2026 جىلعى ماۋسىمدا ول گرۋزيا اۋماعىندا ۇستالىپ، باس پروكۋراتۋرانىڭ سۇراۋ سالۋى بويىنشا قازاقستانعا ەكستراديتسيالانعان.
قازىرگى ۋاقىتتا كۇدىكتى تەرگەۋ يزولياتورىنا قاماۋعا الىندى.
وعان تاعىلىپ وتىرعان قىلمىس ءۇشىن مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ون جىلعا دەيىنگى مەرزىمگە ايىرا وتىرىپ، ون جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.
