بۇگىن، 15 قازاندا سيريانىڭ ۋاقىتشا پرەزيدەنتى احمەد اش-شاراا ماسكەۋدە رەسەي پرەزيدەنتى ۆلاديمير پۋتينمەن كەزدەسىپ، ودان ەكس-باسشى باشار اسادتى ەكستراديتسيالاۋدى تالاپ ەتتى، دەپ حابارلايدى «ادىرنا» ءتىلشىسى.
«ول اسادتى سيريالىقتارعا قارسى جاسالدى دەپ بولجاناتىن قىلمىستار بويىنشا سوتقا بەرۋ ءۇشىن رەسمي تۇردە ەكستراديتسيالاۋدى تالاپ ەتتى»، — دەلىنگەن Reuters حابارلاماسىندا.
ودان بولەك، تاراپتار سيرياداعى رەسەيلىك اسكەري نىسانداردىڭ، سونىڭ ىشىندە تارتۋس تەڭىز بازاسى مەن حمەيميم اۋە بازاسىنىڭ كەلەشەگىن تالقىلاعان. رەسەي پرەزيدەنتىنىڭ ءباسپاسوز حاتشىسى دميتري پەسكوۆ بۇعان دەيىن بۇل تاقىرىپ پۋتين مەن اش-شاراانىڭ كەلىسسوزدەرىندەگى نەگىزگى ماسەلە بولاتىنىن ناقتىلاعان. قازىر سيريادا رەسەيدىڭ اسكەرى ازايعان، الايدا حمەيميم مەن تارتۋس پورتىنداعى رەسەيلىك بازالار جۇمىس ىستەپ تۇر.
رەسمي اقپاراتقا قاراعاندا، رەسەي پرەزيدەنتى ماسكەۋ داماسكىمەن قارىم-قاتىناستا ءاردايىم "سيريا حالقىنىڭ مۇددەسىن باسشىلىققا الادى" جانە بۇل قارىم-قاتىناس ءاردايىم دوستىق سيپاتتا بولعانىن ەسكە سالعان. ءاش-شارا ءوز كەزەگىندە سيريا بيلىگى بۇعان دەيىن رەسەيمەن جاسالعان كەلىسىمدەردى قۇرمەتتەيتىنىن مالىمدەگەن.
احمەد اش-شاراا 2025 جىلدىڭ قاڭتارىندا بيلىكتىڭ وپپوزيتسيالىق كۇشتەرگە وتۋىنەن كەيىن سيريانى باسقارۋعا كىرىسكەن ەدى. 2000 جىلدان بەرى ەلدى باسقارعان باشار اساد سيريادان كەتىپ، باق دەرەگىنشە رەسەيدەن ساياسي باسپانا العان. 2025 جىلدىڭ قىركۇيەگىندە سيريالىق سوت اسادتى اۋىر قىلمىستار بويىنشا سىرتتاي قاماۋعا الۋ تۋرالى شەشىم شىعارعان.
