قازاقستان بيلىگى «ازيا اۆتو – بيپەك اۆتو» كومپانيالار توبىنىڭ بۇرىنعى باسشىلارى اناتولي بالۋشكين مەن ەرىك ساعىمباەۆتى رەسەيدەن ەكستراديتسيالاۋ بويىنشا ازىرگە ناتيجە شىعارا المادى. بۇرىنعى توپ-مەنەدجەرلەر بۇگىندە رەسەي ازاماتتىعىنا يە بولعان جانە سول ەلدىڭ اۋماعىندا ءجۇر. بۇل تۋرالى باس پروكۋراتۋرا مالىمدەدى، دەپ حابارلايدى «ادىرنا» Tengrinews.kz-كە سىلتەپ.
ۆەدومستۆونىڭ ايتۋىنشا، شەتەلدە جۇرگەن ءوز ازاماتتارىنا قاتىستى شەتەل سوتتارىنىڭ ۇكىمىن تانۋ مەن ورىنداۋ ماسەلەسى 2002 جىلعى قۇقىقتىق كومەك تۋرالى كونۆەنتسيامەن رەتتەلەدى.
قازاقستان باس پروكۋراتۋراسى رەسەيگە بالۋشكين مەن ساعىمباەۆقا قاتىستى قازاقستان سوتىنىڭ ۇكىمىن تانۋ جانە ورىنداۋ تۋرالى بىرنەشە رەت رەسمي ءوتىنىش جولداعان. الايدا رەسەي ادىلەت مينيسترلىگى وتىنىشتەردى قاناعاتتاندىرماعان.
مۇنىڭ سەبەبى – رەسەي فەدەراتسياسى اتالعان كونۆەنتسيانى راتيفيكاتسيالاۋ كەزىندە 109-باپتى قولدانباۋ قۇقىعىن قالدىرعان. بۇل باپ ەل ازاماتتارىنا قاتىستى شەتەل سوت ۇكىمدەرىن ورىنداۋدى مىندەتتەمەيدى.
باس پروكۋراتۋرا ەكەۋىنىڭ دە حالىقارالىق ىزدەۋدەن الىنباعانىن اتاپ ءوتتى.
«ولار باسقا مەملەكەت اۋماعىندا انىقتالعان نەمەسە ۇستالعان جاعدايدا، ەكستراديتسيالاۋ جونىندەگى جۇمىس جالعاسادى»، – دەدى ۆەدومستۆو.
سونىمەن بىرگە، ولاردىڭ رەسەي ازاماتتىعىن العاننان كەيىن قازاقستان ازاماتتىعىنان ايىرىلعانى ناقتىلاندى.
2025 جىلعى ساۋىردە رەزونانستى ءىس بويىنشا سوت ۇكىمى شىققان بولاتىن. اناتولي بالۋشكين اسا ءىرى كولەمدەگى الاياقتىق بويىنشا كىنالى دەپ تانىلىپ، 9 جىلعا سوتتالدى. ال ەرىك ساعىمباەۆ الاياقتىق جانە سالىقتان جالتارۋ باپتارى بويىنشا 8 جىل 6 ايعا باس بوستاندىعىنان ايىرىلعان.
ەكى بيزنەسمەن دە سوت ۇكىمدەرى شىققان كەزدە قازاقستاننان تىس جەردە بولعان، سوندىقتان سىرتتاي سوتتالعان.
