Qazaqstannyŋ Syrtqy ıster ministrlıgı Grekiiada jazasyn ötep jatqan qazaqstandyq azamatqa qatysty jaǧdaiǧa tüsınıkteme berdı, dep habarlaidy “Adyrna”.
Vedomstvonyŋ mälımetınşe, azamat Grekiia sotynyŋ şeşımımen zaŋsyz migranttardy tasymaldaǧany üşın kınälı dep tanylyp, sottalǧan. Grekiia zaŋnamasyna säikes, mūndai qylmys asa auyr sanatqa jatady.
«Grekiiadaǧy bızdıŋ diplomattar öz qūzyretı şeŋberınde azamatqa qajettı konsuldyq-qūqyqtyq kömek körsetıp jatyr. Būl mäsele ministrlıktıŋ baqylauynda», – dedı vedomstvonyŋ resmi ökılı Erlan Jetıbaev.
Eske salaiyq, būǧan deiın Aqtöbe qalasynyŋ tūrǧyny Nūrhan Qadyrova ūlynyŋ ısıne bailanysty Qazaqstannyŋ Syrtqy ıster ministrlıgınen kömek sūraǧan bolatyn. Anasynyŋ aituynşa, onyŋ ūly ekı jylǧa juyq uaqyttan berı Grekiia türmesınde otyr jäne sot ony 125 jylǧa bas bostandyǧynan aiyrǧan.
Äieldıŋ sözınşe, ūly şetelge keter aldynda būl turaly jaqyndaryna aitpaǧan. Keiın onyŋ Türkiiaǧa jūmysqa ketkenı belgılı bolǧan. Bıraz uaqyt ötken soŋ, jas jıgıt Grekiia türmesınen habarlasqan.
Anasynyŋ mälımdeuınşe, ūly Instagram äleumettık jelısındegı jūmys turaly habarlandyruǧa senıp, jol aqysy tölenetın jäne turistermen jūmys ısteu ūsynylǧan qyzmetke kelısken. Alaida keiın ol zaŋsyz migranttardy tasymaldau ısıne tartylǧan boluy mümkın.
Nūrhan Qadyrova ūlynyŋ qylmystyq shemany ūiymdastyrmaǧanyn, kerısınşe, aldau qūrbany bolǧanyn aitady.
