قر پرەمەر-ءمينيسترىنىڭ ءبىرىنشى ورىنباسارى قىزىلورداعا جۇمىس ساپارىمەن كەلدى

قر پرەمەر-ءمينيسترىنىڭ ءبىرىنشى ورىنباسارى  نۇرلىبەك نالىباەۆ ۇكىمەت باسشىسىنىڭ تاپسىرماسىمەن قىزىلوردا وبلىسىنا  جۇمىس ساپارمەن كەلدى.

الدىمەن پرەزيدەنت ساياباعى اۋماعىندا بوي كوتەرگەن توعىز قاباتتى 15 تۇرعىن ءۇيدىڭ قۇرىلىس بارىسىمەن تانىستى. 

جالپى قۇنى 22 ملرد تەڭگە بولاتىن جوبا رەسپۋبليكالىق بيۋدجەت ەسەبىنەن قارجىلاندىرىلعان. باس مەردىگەر «مەليوراتور» سەرىكتەستىگى 8,2 گەكتار اۋماققا زاماناۋي ۇلگىدەگى 15 تۇرعىن ءۇي كەشەنىن سالدى. جوبا بويىنشا 945 پاتەر پايدالانۋعا بەرىلەدى. ونىڭ 135-ءى ءبىر بولمەلى، 540-ى ەكى بولمەلى جانە 270-ءى ءۇش بولمەلى. كەشەن قازان ايىندا تابىستالادى.
بۇدان كەيىن نۇرلىبەك ماشبەكۇلى وبلىس ورتالىعىندا  20 ملرد. 61 ملن تەڭگەگە سالىنىپ جاتقان  «قىزىلوردا ارەنا» كوپفۋنكتسيونالدى سپورت كەشەنىنىڭ قۇرىلىسىن كوردى. جالپى اۋماعى 26 مىڭ شارشى مەتر بولاتىن كەشەن قۇرىلىسى 2025 جىلى شىلدەدە باستالعان بولاتىن. مۇندا 50 مەترلىك ءجۇزۋ باسسەينى، حالىقارالىق دودالاردى وتكىزۋگە ارنالعان 2500 ورىندىق زال، فورۋمدار مەن ءتۇرلى جيىندارعا ارنالعان 300 ورىندىق كونفەرەنتسيا زالى قاراستىرىلعان.
قازىر مۇندا ارلەۋ، مەتالل كونسترۋكتسيالارىن ورناتۋ، تەرەزەلەر مەن ۆيتراجداردى مونتاجداۋ، ينجەنەرلىك جانە ەلەكتر جەلىلەرىن جۇرگىزۋ، سونداي-اق اۋماقتى اباتتاندىرۋ جۇمىستارى قارقىن العان. 
عيماراتتىڭ قاسبەتى زاماناۋي ساۋلەت ۇلگىسىمەن بەزەندىرىلىپ، ۆيتراجى بەرىك شىنىمەن قاپتالادى. كەشەن پايدالانۋعا بەرىلگەننەن كەيىن وقۋ-جاتتىعۋ جيىندارىن وتكىزۋگە تولىق بەيىمدەلەدى. نىساندى بيىل پايدالانۋعا بەرۋ جوسپارلانعان.
قۇرىلىس بارىسىمەن تانىسقان پرەمەر-ءمينيستردىڭ ءبىرىنشى ورىنباسارى جاۋاپتى سالا ماماندارىنا بارلىق جۇمىستى ساپالى اتقارىپ، بەلگىلەنگەن مەرزىمدە اياقتاۋدى،  قۇرىلىس ساپاسىن تۇراقتى باقىلاۋدا ۇستاۋدى تاپسىردى.