قىزىلوردا وبلىسىنىڭ جاڭا اكىمى نۇرلىبەك نالىباەۆ كەڭەسشىلەردەن باس تارتتى.
ايماق باسشىسى وبلىس اكىمدىگىنىڭ كەڭەيتىلگەن جيىن وتىرىسىندا قر پرەزيدەنتى قاسىم-جومارت توقاەۆتىڭ تاپسىرماسىنا سايكەس مەملەكەتتىك اپپاراتتى وڭتايلى جانە ءتيىمدى ەتۋ ماقساتىندا باعىتتاس باسقارمالاردى بىرىكتىرەتىنىن مالىمدەدى. 24 باسقارمانىڭ 8-ءى قىسقارىپ، وبلىس اكىمدىگىنىڭ قۇرىلىمىندا 16 باسقارما قالاتىنىن جەتكىزدى.
«وزدەرىڭىز بىلەسىزدەر، وڭىردە 24 وبلىستىق باسقارما جۇمىس جاسايدى. ەندى، سونىڭ 8-ءى قىسقارىپ، وبلىس اكىمدىگىنىڭ قۇرىلىمىندا 16 باسقارما قالاتىن بولادى. قابىلدانعان شەشىم قىزمەتتەردىڭ قايتالانۋىن جويۋعا، جالپى جۇمىس مولشەرىنىڭ تەپە-تەڭ رەتتەلۋىن قامتاماسىز ەتۋگە جانە باسشىلىق قۇرامدى وڭتايلاندىرۋ ەسەبىنەن اكىمشىلىك شىعىنداردى قىسقارتۋعا مۇمكىندىك بەرەدى. ءدال وسىلاي قالا جانە اۋدان اكىمدىكتەرىنىڭ دە قۇرىلىمىن وزگەرتۋ قاجەت»، - دەدى وبلىس اكىمى.
سونداي-اق، نۇرلىبەك نالىباەۆ اكىم اپپاراتىندا الداعى ۋاقىتتا وبلىس اكىمىنىڭ شتاتتاعى جانە شتاتتان تىس كەڭەسشى لاۋازىمدارى بولمايتىنىن مالىمدەدى.
«بۇدان ءارى وبلىس اكىمىنىڭ شتاتتاعى جانە شتاتتان تىس كەڭەسشى لاۋازىمدارى بولمايدى. كەز كەلگەن ادامعا كەڭەسشى دەگەن كۋالىكتى تاراتا بەرۋدى قويۋىمىز كەرەك. ءبىزدىڭ كەڭەسشىمىز – حالىق!»، - دەدى وبلىس اكىمى.
