كوكتەمنىڭ شۋاقتى لەبى سەزىلىپ، تابيعات جاڭارعان شاقتا حالقىمىزدىڭ ەڭ قاستەرلى مەرەكەلەرىنىڭ ءبىرى – ۇلىستىڭ ۇلى كۇنى قارساڭىنداعى كورىسۋ كۇنى ەرەكشە مانگە يە.
ءداستۇر مەن تاعىلىم توعىسقان بۇل مەرەكەدە حالقىمىزدىڭ ءبىر-بىرىمەن قاۋىشىپ، اماندىق سۇراسۋى، ۇلكەنگە قۇرمەت، كىشىگە ىزەت كورسەتۋى – ۇرپاق ساباقتاستىعىنىڭ ايقىن كورىنىسى.
وسى يگى مەرەكە اياسىندا ۇلتتىق سالت-ءداستۇرىمىزدى ۇلىقتاعان «امال كەلدى، جىل كەلدى» اتتى تاعىلىمدى شارا ءوتتى. ارنايى بەزەندىرىلگەن الاڭدا كيىز ۇيلەر تىگىلىپ، ۇلتتىق ناقىشتاعى كورىنىستەر قويىلدى. كيىز ءۇي جانىنداعى شەتەندە جاڭا تۋعان قوزى-لاقتار كورىنىس تاۋىپ، تابيعات پەن تىرشىلىكتىڭ جاڭارۋىن ايشىقتادى.
شارانىڭ شىمىلدىعى كوپشىلىك تاماشالاعان ۇلتتىق ناقىشتاعى كورمەدەن كەيىن ءۇش ءبۇلدىرشىننىڭ تۇساۋ كەسۋ راسىمىمەن اشىلدى. «جاقسىلاردان جۇعىم بولسىن» دەگەن ىزگى نيەتپەن باعداتۇلى دىنمۇحاممەد، ايدوسۇلى ەرداۋلەت جانە الىشەرقىزى ءايليننىڭ تۇساۋى كەسىلىپ، ەل اعالارى اق باتاسىن بەردى. بۇل – بولاشاققا قادام باسقان جاس ۇرپاققا اق جول تىلەگەن حالقىمىزدىڭ كونە ءداستۇرىنىڭ نىشانى.
سالتاناتتى ساتتەن كەيىن مەرەكەلىك باعدارلاما ۇلتتىق بي مەن تەاترلاندىرىلعان قويىلىمعا ۇلاسىپ، جاس ارتىستەر كورىسۋ كۇنىنىڭ ءمانى مەن ماڭىزىن كوركەم بەينەلەدى. بالالار مەن ۇلكەندەردىڭ كورىسۋ ءداستۇرى، تابيعاتتىڭ جاڭارۋى، ناۋرىزەك قۇسىنىڭ كەلۋى ارقىلى بىرلىك پەن بەرەكەنىڭ سيمۆولدىق كورىنىسى ساحنالاندى.
مەرەكەلىك جيىندا ءسوز العان قالا اكىمىنىڭ ورىنباسارى دىلمۇحامەد ابيزوۆ جينالعان كوپشىلىكتى كورىسۋ كۇنىمەن قۇتتىقتاپ، ەل بىرلىگى مەن بەرەكەسىنىڭ ارتا بەرۋىنە تىلەكتەستىك ءبىلدىردى.
شارا سوڭى كونتسەرتتىك باعدارلاماعا ۇلاسىپ، ونەرپازدار ءان مەن بيدەن شاشۋ شاشتى. ۇلىستىڭ ۇلى كۇنى قارساڭىنداعى وسىنداي تاعىلىمدى شارالار ۇلتتىق قۇندىلىقتارىمىزدى دارىپتەپ، جاس ۇرپاقتىڭ بويىنا سالت-داستۇرگە دەگەن قۇرمەتتى قالىپتاستىرا تۇسەتىنى انىق.
