ماڭعىستاۋ وبلىسىندا مەملەكەت باسشىسى قاسىم-جومارت توقاەۆتىڭ تاپسىرماسىمەن جۇزەگە اسىرىلىپ جاتقان ستراتەگيالىق ماڭىزى بار ينفراقۇرىلىمدىق جوبا – كەندىرلى جاڭا اۋەجايىنىڭ قۇرىلىسى بەلگىلەنگەن كەستەگە سايكەس جالعاسۋدا.
جاڭا اۋە ايلاعى ءوڭىردىڭ كولىك-لوگيستيكالىق جانە تۋريستىك الەۋەتىن ارتتىراتىن نەگىزگى دامۋ نۇكتەلەرىنىڭ بىرىنە اينالماق. ول كەندىرلى كۋرورتتىق ايماعىنا تىكەلەي اۋە قاتىناسىن قامتاماسىز ەتىپ، ينۆەستيتسيا تارتۋعا، كاسىپكەرلىكتى دامىتۋعا جانە تۋريستەر اعىنىن ۇلعايتۋعا مۇمكىندىك بەرەدى.
اۋەجاي كەشەنىنىڭ نەگىزگى نىساندارى بويىنشا جۇمىستار قارقىندى جۇرگىزىلۋدە. اتاپ ايتقاندا، ۇشۋ-قونۋ جولاعىنىڭ دايىندىعى – 71,8 پايىز، پەرروننىڭ – 63,2 پايىز، رۋلدەۋ جولىنىڭ – 66,1 پايىز، جولاۋشىلار تەرمينالىنىڭ – 51,7 پايىز. سونىمەن قاتار ينجەنەرلىك ينفراقۇرىلىم قۇرىلىسى قاتار اتقارىلۋدا. سىرتقى گاز قۇبىرىنىڭ قۇرىلىسى 95 پايىزعا، سۋمەن جابدىقتاۋ جەلىلەرى 80 پايىزعا، سىرتقى بايلانىس جەلىلەرى 100 پايىزعا، ەلەكترمەن جابدىقتاۋ جەلىلەرى 85 پايىزعا ورىندالدى.
قۇرىلىستىڭ ۇزدىكسىز جۇرگىزىلۋىن قامتاماسىز ەتۋ ءۇشىن قاجەتتى ماتەريالدىق-تەحنيكالىق رەسۋرستار تولىق جۇمىلدىرىلعان. قازىرگى ۋاقىتتا نىساندا 132 ارنايى تەحنيكا جۇمىس ىستەيدى. ونىڭ 82-ءسى قۇرىلىس الاڭىندا ەڭبەك ەتسە، تاعى 50 تەحنيكا ينەرتتى ماتەريالداردى ۇزدىكسىز جەتكىزۋدى قامتاماسىز ەتۋدە. قۇرىلىس جۇمىستارىنا كۇن سايىن 290 مامان تارتىلعان.
جوبا كەشەندى تۇردە جۇزەگە اسىرىلۋدا جانە ونىڭ ورىندالۋ بارىسى تۇراقتى باقىلاۋدا. قۇرىلىستىڭ بارلىق ءتورت كەزەڭى بويىنشا ازىرلەنگەن جوبالىق-سمەتالىق قۇجاتتاما مەملەكەتتىك ساراپتامادان ءوتىپ، وڭ قورىتىندى العان. قازىرگى تاڭدا جولاۋشىلار تەرمينالىنىڭ، اۋەايلاق ينفراقۇرىلىمى نىساندارىنىڭ جانە ينجەنەرلىك جەلىلەردىڭ قۇرىلىسى قارقىندى جۇرگىزىلۋدە. بۇل ءوز كەزەگىندە جوبانى ىسكە اسىرۋ قارقىنىن تۇراقتى دەڭگەيدە ساقتاۋعا مۇمكىندىك بەرىپ وتىر.
اۋەجاي پايدالانۋعا بەرىلگەننەن كەيىن ءوڭىردىڭ كولىك الەۋەتى ايتارلىقتاي ارتادى. ماڭعىستاۋ وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە، ىشكى جانە حالىقارالىق باعىتتار بويىنشا توعىز جاڭا اۋە باعىتىن اشۋ جوسپارلانىپ وتىر. ىشكى رەيستەر استانا، الماتى، اقتوبە، اتىراۋ، ورال جانە قىزىلوردا قالالارىنا قاتىنايتىن بولسا، حالىقارالىق رەيستەر نۇكىس، باكۋ جانە استراحان قالالارىنا اشىلادى. بۇل باعىتتار ءوڭىردىڭ كولىك بايلانىسىن جاقسارتىپ، تۇرعىندار مەن تۋريستەر ءۇشىن قولايلى لوگيستيكالىق مۇمكىندىكتەر قالىپتاستىرادى. سونىمەن قاتار كەندىرلىنىڭ كاسپي تەڭىزى جاعالاۋىنداعى تۋريزم مەن ىسكەرلىك بەلسەندىلىكتىڭ جاڭا ورتالىعى رەتىندەگى الەۋەتىن كۇشەيتەدى.
كەندىرلى اۋەجايىنىڭ قۇرىلىسى – مەملەكەت باسشىسىنىڭ تاپسىرماسىنا سايكەس كولىك ينفراقۇرىلىمىن دامىتۋعا، ەلدىڭ ترانزيتتىك الەۋەتىن نىعايتۋعا جانە ەكونوميكالىق ءوسۋدىڭ جاڭا نۇكتەلەرىن قالىپتاستىرۋعا باعىتتالعان جۇيەلى جۇمىستىڭ ماڭىزدى بولىگى. جوبا اياقتالعاننان كەيىن كەندىرلى كۋرورتتىق ايماعىمەن تىكەلەي اۋە قاتىناسى قامتاماسىز ەتىلىپ، ءوڭىردىڭ تۋريستىك تارتىمدىلىعى ارتادى. سونىمەن قاتار باتىس قازاقستاننىڭ لوگيستيكالىق مۇمكىندىكتەرى كەڭەيىپ، جاڭا جۇمىس ورىندارى اشىلىپ، ماڭعىستاۋ وبلىسىنىڭ الەۋمەتتىك-ەكونوميكالىق دامۋىنا سەرپىن بەرەدى.
كەندىرلى اۋەجايىنىڭ قۇرىلىسىن 2026 جىلدىڭ سوڭىندا اياقتاۋ جوسپارلانىپ وتىر.
