شىعىس قازاقستان وبلىسىندا وسكەمەن اۋەجايىنىڭ باسشىلىعىنا قاتىستى ءىرى كولەمدەگى ۇرلىق، قىزمەتتىك وكىلەتتىگىن اسىرا پايدالانۋ جانە قىلمىستىق جولمەن الىنعان كىرىستى زاڭداستىرۋ فاكتىلەرى بويىنشا قوزعالعان ىسكە بايلانىستى تەرگەۋ اياقتالدى، دەپ حابارلايدى "ادىرنا" ۇلتتىق پورتالى قارجىلىق مونيتورينگ اگەنتتىگىنە سىلتەمە جاساپ.
تەرگەۋ دەرەكتەرىنە سايكەس، بەس جىل بويى بۇرىنعى پرەزيدەنت پەن اكتسيونەرلىك قوعامنىڭ باسقا دا لاۋازىمدى تۇلعالارى كاسىپورىننىڭ قارجىسىن جۇيەلى تۇردە يەمدەنىپ وتىرعان. ولار جالاقىنى جاساندى تۇردە كوتەرۋ، جالعان سىياقى بەرۋ جانە شىن مانىندە ورىندالماعان شارتتارعا قول قويۋ سياقتى سحەمالار ارقىلى اقشا ۇرلاعان. ۇرلانعان قاراجات كاسىپورىننىڭ كاسساسى ارقىلى قولما-قول اقشاعا اينالدىرىلعان.
سونداي-اق اكتسيونەرلىك قوعامعا تيەسىلى اۆتوكولىكتەر بۋحگالتەرلىك بالانستان شىعارىلىپ، بايلانىسى بار ادامدارعا تىم تومەن باعامەن ساتىلعانى انىقتالدى. بۇدان بولەك، كوممەرتسيالىق جىلجىمايتىن مۇلىكتەر جالعا تومەن باعامەن جانە جالداۋ الاڭى ازايتىلىپ بەرىلگەن.
تەرگەۋ دەرەگى بويىنشا مەملەكەتكە كەلتىرىلگەن جالپى شىعىن 157 ميلليون تەڭگەنى قۇراعان.
سوت شەشىمىمەن كۇدىكتىلەردىڭ مۇلكىنە 126 ميلليون تەڭگە كولەمىندە تىيىم سالىندى. تاركىلەنگەن مۇلىكتەر تىزىمىنە ءتورت پاتەر، جەر تەلىمى جانە ەكى اۆتوكولىك كىرەدى.
قىلمىستىق ىسكە قاتىسى بار تۇلعالار قاماۋعا الىندى. قىلمىستىق-پروتسەستىك كودەكستىڭ 201-بابىنا سايكەس، وزگە مالىمەتتەر جاريا ەتۋگە جاتپايدى.
