بۇگىن، 16 قاراشادا مەملەكەت باسشىسى قاسىم-جومارت توقاەۆ ۇلتتىق قاۋىپسىزدىك كوميتەتىنىڭ جاڭا توراعاسى مارات يرمەنوۆتى تانىستىرىپ، وعان بىرقاتار مىندەت جۇكتەدى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
پرەزيدەنت ۇلتتىق قاۋىپسىزدىك ورگاندارى جۇيەسىن رەفورمالاۋ، ۆەدومستۆو الدىنا قويىلعان ماقساتتارعا جەتۋدىڭ جاڭا تاسىلدەرىن ازىرلەۋ جانە قىزمەت تيىمدىلىگىن ارتتىرۋ قاجەتتىگىنە توقتالدى.
قاسىم-جومارت توقاەۆ «زاڭ مەن ءتارتىپ» قاعيداتىنىڭ ورىندالۋىنا، مەملەكەتتىڭ ەكونوميكا سالاسىنداعى ۇلتتىق مۇددەسىن قامتاماسىز ەتۋگە، سىبايلاس جەمقورلىققا جانە باسقا دا زاڭ بۇزۋشىلىقتارعا قارسى ءىس-قيمىلعا باسا نازار اۋدارۋ كەرەك ەكەنىن اتاپ ءوتتى.
سونىمەن قاتار پرەزيدەنت كادرلاردى ىرىكتەۋ ءتارتىبىن جەتىلدىرۋ، الەۋمەتتىك-ەكونوميكالىق تۇراقتىلىققا تونەتىن قاۋىپتىڭ الدىن الۋ، باسىمدىققا يە مەملەكەتتىك باعدارلامالاردى جۇزەگە اسىرۋ بارىسىندا جەمقورلىق تاۋەكەلدەرىن بولدىرماۋ جونىندەگى پروفيلاكتيكالىق شارالاردى كۇشەيتۋ تۋرالى تاپسىرما بەردى.
