استانا حالىقارالىق اۋەجايىندا 2500-دەن استام جولاۋشى ءوز رەيسىن كۇتۋدە. بۇل تۋرالى 30 جەلتوقسان كۇنى كەشكە كولىك مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى «ادىرنا» ۇلتتىق پورتالى.
ەلوردا اۋەجايىندا 30 جەلتوقسان كۇنى ساعات 15:00-دەن 00:00-گە دەيىن 29 رەيستى ورىنداۋ جوسپارلانعان بولاتىن. الايدا ەلورداداعى اۋا رايىنا بايلانىستى 21 رەيس كەشىكتىرىلىپ، سەگىز رەيس كەيىنگە شەگەرىلدى.
وسىعان بايلانىستى كولىك ءمينيسترى مارات قاراباەۆ جەدەل شتاب قۇردى. قازىر جەدەل شتاب پەن اۋە كومپانيالارىنىڭ وكىلدەرى تۇسىندىرمە جۇمىستارىن جۇرگىزىپ، وزەكتى سۇراقتارعا جاۋاپ بەرۋدە.
رەيسىن كۇتكەن جولاۋشىلارعا Terminals Astana Airport Management باسشىلىعى ەكى مىڭنان استام ىستىق تاماق پەن سۋسىندار تاراتتى. جولاۋشىلار اراسىندا ەرەسەكتەردەن بولەك بالالار دا بار. مەرەكەلىك كوڭىل-كۇي ءۇشىن اياز اتا مەن اقشاقار ولارمەن ويىن وينايدى، جاڭا جىلدىق سىيلىقتاردى تاراتادى. سونىمەن قاتار ەلوردالىق ارتىستەر جولاۋشىلارعا ونەر كورسەتەدى.
ءباسپاسوز قىزمەتىنىڭ ايتۋىنشا، ءوز ۇشاقتارىن كۇتكەن جولاۋشىلار اۋا رايىنا بايلانىستى تۋىنداعان «ۋاقىتشا قولايسىزدىقتارعا تۇسىنىستىكپەن قاراعانىن». سونداي-اق ولار «قاجەتتى كومەك كورسەتكەن ماماندارعا العىستارىن بىلدىرەدى».
ەلوردالىق اەرودرومداعى اۋا رايى ءالى دە ۇشىپ-قونۋعا قولايسىز. سونىڭ سالدارىنان اۋە كومپانيالارى رەيستەردى كەيىنگە شەگەرىپ، كەيىنگە قالدىرۋعا شەشىم قابىلدادى.
«ادىرنا» ۇلتتىق پورتالى
