Maŋǧystau oblysynda Memleket basşysy Qasym-Jomart Toqaevtyŋ tapsyrmasymen jüzege asyrylyp jatqan strategiialyq maŋyzy bar infraqūrylymdyq joba – Kendırlı jaŋa äuejaiynyŋ qūrylysy belgılengen kestege säikes jalǧasuda.
Jaŋa äue ailaǧy öŋırdıŋ kölık-logistikalyq jäne turistık äleuetın arttyratyn negızgı damu nüktelerınıŋ bırıne ainalmaq. Ol Kendırlı kurorttyq aimaǧyna tıkelei äue qatynasyn qamtamasyz etıp, investisiia tartuǧa, käsıpkerlıktı damytuǧa jäne turister aǧynyn ūlǧaituǧa mümkındık beredı.
Äuejai keşenınıŋ negızgı nysandary boiynşa jūmystar qarqyndy jürgızılude. Atap aitqanda, ūşu-qonu jolaǧynyŋ daiyndyǧy – 71,8 paiyz, perronnyŋ – 63,2 paiyz, ruldeu jolynyŋ – 66,1 paiyz, jolauşylar terminalynyŋ – 51,7 paiyz. Sonymen qatar injenerlık infraqūrylym qūrylysy qatar atqaryluda. Syrtqy gaz qūbyrynyŋ qūrylysy 95 paiyzǧa, sumen jabdyqtau jelılerı 80 paiyzǧa, syrtqy bailanys jelılerı 100 paiyzǧa, elektrmen jabdyqtau jelılerı 85 paiyzǧa oryndaldy.
Qūrylystyŋ üzdıksız jürgızıluın qamtamasyz etu üşın qajettı materialdyq-tehnikalyq resurstar tolyq jūmyldyrylǧan. Qazırgı uaqytta nysanda 132 arnaiy tehnika jūmys ısteidı. Onyŋ 82-sı qūrylys alaŋynda eŋbek etse, taǧy 50 tehnika inerttı materialdardy üzdıksız jetkızudı qamtamasyz etude. Qūrylys jūmystaryna kün saiyn 290 maman tartylǧan.
Joba keşendı türde jüzege asyryluda jäne onyŋ oryndalu barysy tūraqty baqylauda. Qūrylystyŋ barlyq tört kezeŋı boiynşa äzırlengen jobalyq-smetalyq qūjattama memlekettık saraptamadan ötıp, oŋ qorytyndy alǧan. Qazırgı taŋda jolauşylar terminalynyŋ, äueailaq infraqūrylymy nysandarynyŋ jäne injenerlık jelılerdıŋ qūrylysy qarqyndy jürgızılude. Būl öz kezegınde jobany ıske asyru qarqynyn tūraqty deŋgeide saqtauǧa mümkındık berıp otyr.
Äuejai paidalanuǧa berılgennen keiın öŋırdıŋ kölık äleuetı aitarlyqtai artady. Maŋǧystau oblysynyŋ jolauşylar kölıgı jäne avtomobil joldary basqarmasynyŋ mälımetınşe, ışkı jäne halyqaralyq baǧyttar boiynşa toǧyz jaŋa äue baǧytyn aşu josparlanyp otyr. Işkı reister Astana, Almaty, Aqtöbe, Atyrau, Oral jäne Qyzylorda qalalaryna qatynaityn bolsa, halyqaralyq reister Nükıs, Baku jäne Astrahan qalalaryna aşylady. Būl baǧyttar öŋırdıŋ kölık bailanysyn jaqsartyp, tūrǧyndar men turister üşın qolaily logistikalyq mümkındıkter qalyptastyrady. Sonymen qatar Kendırlınıŋ Kaspii teŋızı jaǧalauyndaǧy turizm men ıskerlık belsendılıktıŋ jaŋa ortalyǧy retındegı äleuetın küşeitedı.
Kendırlı äuejaiynyŋ qūrylysy – Memleket basşysynyŋ tapsyrmasyna säikes kölık infraqūrylymyn damytuǧa, eldıŋ tranzittık äleuetın nyǧaituǧa jäne ekonomikalyq ösudıŋ jaŋa nüktelerın qalyptastyruǧa baǧyttalǧan jüielı jūmystyŋ maŋyzdy bölıgı. Joba aiaqtalǧannan keiın Kendırlı kurorttyq aimaǧymen tıkelei äue qatynasy qamtamasyz etılıp, öŋırdıŋ turistık tartymdylyǧy artady. Sonymen qatar Batys Qazaqstannyŋ logistikalyq mümkındıkterı keŋeiıp, jaŋa jūmys oryndary aşylyp, Maŋǧystau oblysynyŋ äleumettık-ekonomikalyq damuyna serpın beredı.
Kendırlı äuejaiynyŋ qūrylysyn 2026 jyldyŋ soŋynda aiaqtau josparlanyp otyr.
