بەلگىلى قوعام قايراتكەرى نۇرتورە ءجۇسىپتىڭ ايتۋىنشا، جاستارعا شابىت بەرەتىن، ولاردىڭ ارمانىن وياتىپ، ىزدەنۋگە جەتەلەيتىن تۇلعالار تۋرالى ەڭبەكتەردى كوبەيتۋ قاجەت. ول الەمگە جاڭاشىلدىعىمەن تانىلعان يلون ماسك سەكىلدى ادامداردىڭ تابىس جولىن زەرتتەۋمەن قاتار، قازاقستاننان دا سونداي اۋقىمدى ويلايتىن، تەحنولوگيا مەن عىلىمدا سەرپىلىس جاسايتىن ازاماتتاردى كەڭىنەن ناسيحاتتاۋ ماڭىزدى ەكەنىن اتاپ ءوتتى.
بۇل تۋرالى ول "ادىرنا" ۇلتتىق پورتالىنا بەرگەن سۇحباتىندا ايتتى.
ونىڭ پىكىرىنشە، قازاق جاستارىنىڭ اراسىنان دا ءوز يلون ماسكى شىعۋى ابدەن مۇمكىن. ول ءۇشىن جاس ۇرپاققا ناقتى ۇلگى بولاتىن وقيعالار كوبىرەك ايتىلىپ، عىلىمعا، تەحنولوگياعا جانە كاسىپكەرلىككە قىزىقتىراتىن تۇلعالاردىڭ ءومىر جولى كەڭىنەن تانىستىرىلۋى كەرەك.
سونىمەن قاتار، بۇل ماسەلە تەك كىتاپ جازۋمەن شەكتەلمەۋى ءتيىس. مۇنداي وقيعالار وقىرمانعا قىزىقتى فورماتتا ۇسىنىلىپ، قوعامعا كەڭىنەن ناسيحاتتالعانى ماڭىزدى. ويتكەنى ساپالى ەڭبەك جازىلعانىمەن، ونى از عانا ادام وقىسا، نەگىزگى ماقساتقا جەتۋ قيىن. سوندىقتان عىلىم، تەحنولوگيا جانە كاسىپكەرلىك سالاسىندا جەتىستىككە جەتكەن تۇلعالار تۋرالى كىتاپتارمەن قاتار، دەرەكتى فيلمدەر، سەريالدار جانە ءبىلىم بەرۋ جوبالارى دا كوبىرەك جاسالۋى قاجەت.
«ادام ارمانداپ، قيالداي ءبىلۋى كەرەك. مىسالى، قازىر ءبىر عانا يلون ماسكتىڭ ءوزىن الىپ قاراڭىزشى. وسىدان 5-6, 10 جىل بۇرىن ەلەكتروكارلار، بولماسا مارسقا عارىش كەمەسىن ۇشىرىپ، زەرتتەيدى دەپ كىم ويلادى؟! ماسك ادامزات كوشىندە ءبىر ءوزىنىڭ جاساعان يدەياسىنا جاقىندا عانا 76 ملرد دوللار ينۆەستيتسيا قۇيىپ وتىر. ايتقان سوزىنە، ونىڭ ۇسىنعان جوباسىنا امەريكا، قىتاي قولداۋ ءبىلدىرىپ وتىر. قازىر عارىشتى، ايدى يگەرۋگە دە الەم ەلدەرى، ادامزات بالاسى قىزىعۋشىلىق تانىتۋدا»، - دەپ اتاپ ءوتتى قوعام قايراتكەرى.
ايتۋىنشا، عارىشتى باعىندىرۋعا ءبىزدىڭ جاستاردىڭ دا الەۋەتى مەن مۇمكىندىگى جوعارى.
ء«بىزدىڭ بايقوڭىرىمىز تۇر. عارىش سالاسىن وقىپ، زەرتتەپ جۇرگەن جاستارىمىز دا بارشىلىق. قازىر قازاق موينىن بۇرۋى كەرەك. ويتكەنى، ەرتەڭ تەحنولوگياسىنا يە بولىپ، اشىق تۇرعان كەڭىستىكتەردى مەڭگەرىپ، قازاق ۇلتى كىرۋى كەرەك»، - دەيدى نۇرتورە ءجۇسىپ.
