يلون ماسكتىڭ امەريكالىق كوسموستىق كومپانياسى SpaceX-ءتىڭ Starship زىمىرانى تاعى دا تەحاستىڭ بوكا-چيكا كوسمودرومىنان سىناق ۇشىرۋىنان كەيىن جارىلدى. سەگىزىنشى سىناق ۇشۋى باستالعاننان كەيىن شامامەن 10 مينۋت وتكەندە، زىمىراننىڭ كوتەرىلۋى اياقتالۋعا 20 سەكۋند قالعاندا بايلانىس ءۇزىلدى. بۇل تۋرالى 7 ناۋرىزدا تۇندە SpaceX مالىمدەدى، دەپ حابارلايدى “ادىرنا” ۇلتتىق پورتالى.
كاريب تەڭىزىنىڭ ۇستىندە بولعان جارىلىس فلوريدا شتاتىنىڭ بولىكتەرىنەن كورىندى، دەپ حابارلايدى CNN. كومپانيا مالىمەتىنشە، زىمىراننىڭ بىرنەشە قوزعالتقىشى ءوشىپ قالعان، سودان كەيىن ول جارىلعان.
قايتا پايدالانۋعا بولاتىن ءبىرىنشى كەزەڭ - Super Heavy زىمىران-تاسىعىشى جوسپارلانعانداي جەرگە ورالدى جانە ۇشىرۋ كەشەنىنە ءساتتى قوندى. SpaceX كومپانياسى Starship كەمەسىنىڭ الدىڭعى سىناق ۇشىرۋ كەزىندە دە وسىنداي جاعداي ورىن العانىن ايتتى. كومپانيا اۋە قوزعالىسىن باسقارۋ ورگاندارىمەن تىعىز جۇمىس ىستەيتىنىن مالىمدەدى.
جارىلىسقا بايلانىستى اقش-تىڭ ازاماتتىق اۆياتسيا باسقارماسى (FAA) فلوريدا شتاتىنداعى بىرنەشە اۋەجايدا ۇشۋعا شەكتەۋ قويدى، سونىڭ ىشىندە مايامي، ورلاندو، پالم-بيچ جانە فورت-لودەردەيل اۋەجايلارى دا بار. ۆەدومستۆو SpaceX-ءتىڭ ينتسيدەنت بويىنشا بىرلەسكەن تەرگەۋ جۇرگىزۋىن تالاپ ەتتى. سالدارى زىمىران ۇشىرۋلاردىڭ ارى قاراي جالعاسۋىنا اسەر ەتەتىن بولادى.
بۇل Starship زىمىرانىنىڭ ەكىنشى رەت قاتارىنان جارىلۋى. الدىڭعى جەتىنشى سىناق ۇشۋى دا ءساتسىز اياقتالعان.
قاڭتار ايىنىڭ ورتاسىندا زىمىراننىڭ ءبىرىنشى قايتا پايدالانۋعا بولاتىن ساتىسى كەمەنى وربيتاعا شىعارىپ، جەرگە ورالدى، ال جوعارعى ساتى اسپانعا ءبولىنىپ، بارلىق التى Raptor قوزعالتقىشىن ىسكە قوستى.
سودان كەيىن زىمىرانمەن بايلانىس ءۇزىلىپ، جارىلدى جانە بولشەكتەرى كاريب تەڭىزىندەگى تەركس جانە كايكوس ارالدارىنا ءتۇستى. وسىدان كەيىن FAA ۇشۋ شەكتەۋلەرىن ەنگىزدى.
سەگىزىنشى سىناق ۇشۋى 4 ناۋرىزعا جوسپارلانعان بولاتىن، بىراق تەحنيكالىق اقاۋعا بايلانىستى 40 سەكۋند قالعاندا ۇشۋ توقتاتىلدى.
Starship - تاريحتاعى ەڭ ۇلكەن جانە ەڭ قۋاتتى زىمىران. 70 مەترلىك Super Heavy ءبىرىنشى ساتىسىنان جانە قوسىمشا قوزعالتقىشتارى بار 50 مەترلىك Starship عارىش كەمەسىنەن تۇراتىن جۇيەنىڭ جالپى جوبالىق جۇكتەمەسى 150 توننانى قۇرايدى.
NASA بۇل جوبا ارقىلى ايعا جانە جەر وربيتاسىنا پيلوتتىق ۇشۋلاردى قايتا باستاۋعا ۇمىتتەنەدى. يلون ماسك 2026 جىلى وسى زىمىرانمەن ادامداردى مارسقا جىبەرۋدى جوسپارلاپ وتىر.
