پارلامەنت پالاتالارىنىڭ بىرلەسكەن وتىرىسىندا سەنات دەپۋتاتى نۇرتورە ءجۇسىپ جاستارعا ەرەكشە كوڭىل ءبولۋ قاجەتتىگىن ايتتى، دەپ حابارلايدى «ادىرنا» ءتىلشىسى.
«رەسمي دەرەكتەرگە سۇيەنسەك، ەلىمىزدە 5,7 ميلليوننان استام جاس بار. بىلتىر مەملەكەتتىك جاستار ساياساتى تۋرالى زاڭعا ەلەۋلى تولىقتىرۋلار ەنگىزىلدى. جاستار ساناتىن 29-دان 35-كە دەيىن ارتتىردىق. سونىڭ نەگىزىندە NEET جاستارىنىڭ سانى 223 مىڭنان ءبىر جىلدا 422 مىڭعا ءوستى. سالالىق مينيسترلىك بىررەتتىك گرانتتار بەرۋ، جاستار پراكتيكالارىن ۇيىمداستىرۋ، بوس جۇمىس ورىندارى جارمەڭكەلەرىن وتكىزۋ سياقتى ناۋقاندىقپەن شارالارمەن شەكتەلىپ وتىر. جاستارمەن جاندى جۇمىس جۇرگىزۋ كەرەك. ەلىمىزدە ازاماتتارعا ساپالى، جوعارى ءبىلىم بەرۋ، تەحنيكالىق جانە كاسىپتىك داعدىلاردى وقىپ-ۇيرەتۋ، ولاردى الەۋمەتتەندىرۋ جانە جۇمىسپەن قامتۋ شارالارى بۇگىنگى كۇننىڭ تالاپتارىنا تولىق جاۋاپ بەرمەي وتىر»،–دەدى ول.دەپۋتات قازاقستان جاستارى ەلدەگى جۇمىس كۇشىنىڭ شامامەن 40 پايىزىن عانا قۇرايتىنىن اتاپ ءوتتى.
«جوعارى ءبىلىمدى قازاقستاندىق جاستاردىڭ 40 پايىزدان استامى ءوز ماماندىعى بويىنشا جۇمىس ىستەمەيدى. ال تۇلەكتەردىڭ 30 پايىزدان استامى جۇمىس تابا المايدى. بۇلاردىڭ ىشىندە مەملەكەتتتىك تاپسىرىسپەن وقىعاندارى دا جەتكىلىكتى. قازاقتا «ارقا جايلى بولسا، ارقار اۋىپ نەسى بار؟» دەگەن ءسوز بار. وسىنداي جاعىمسىز فاكتورلاردىڭ كەسىرىنەن جاستاردىڭ جايلى ءومىر ىزدەپ، شەتەلگە قونىس اۋدارۋى جيىلەپ جاتقان سياقتى. بيىلعى 1 ساۋىردەگى ستاتيستيكاعا قاراساق، 600-دەن استام جاس شەتەلگە قونىس اۋدارعان»،—دەدى نۇرتورە ءجۇسىپ.
ۇقساس جاڭالىقتار
