بۇگىن «دوستىق ۇيىندە» وبلىس اكىمى مۇرات ەرگەشباەۆ، زيالى قاۋىم وكىلدەرى، وڭىردەگى ۇكىمەتتىك ەمەس ۇيىمدار جەتەكشىلەرى، باسقارما جانە دەپارتامەنت باسشىلارى، جاستار ۇيىمدارى، ازاماتتىق قوعام بەلسەندىلەرىنىڭ قاتىسۋىمەن «كونستيتۋتسيا – ازاماتتىق قوعامدى دامىتۋدىڭ قۇقىقتىق ىرگەتاسى» تاقىرىبىندا وبلىستىق ازاماتتىق فورۋم ءوتتى.
فورۋمدا جاڭا كونستيتۋتسيا اياسىندا ازاماتتىق قوعام ينستيتۋتتارىنىڭ ءرولىن ارتتىرۋ، مەملەكەت پەن قوعام اراسىنداعى سىندارلى ارىپتەستىكتى نىعايتۋ جانە قوعامدىق ديالوگ مادەنيەتىن دامىتۋ ماسەلەلەرى تالقىلاندى.
«حالىقتى ورتاق ماقساتقا جۇمىلدىرىپ، ۇكىمەتتىك ەمەس ۇيىمداردى قوعامدىق ماڭىزى بار باستامالارعا كەڭىنەن تارتۋ – مەملەكەتتىك باسقارۋدىڭ تيىمدىلىگىن ارتتىراتىن ءارى قوعام مەن بيلىك اراسىنداعى ءوزارا سەنىمدى نىعايتاتىن وزىق تاجىريبە.
پرەزيدەنتىمىز قاسىم-جومارت كەمەلۇلى حالىققا ارناعان جولداۋىندا: «ازاماتتىق قوعامعا قولداۋ كورسەتىپ، ونىڭ الەۋەتىن نىعايتا ءتۇسۋ كەرەك. سونداي-اق، اسا ماڭىزدى جالپى مەملەكەتتىك مىندەتتەردى شەشۋ ءۇشىن تالقىلاۋ جۇمىستارىنا ازاماتتىق قوعامنىڭ مۇمكىندىكتەرىن كەڭىنەن قولدانۋ قاجەت» دەپ اتاپ وتكەن بولاتىن.
وڭىرىمىزدەگى ازاماتتىق قوعام ينستيتۋتتارى مەملەكەتتىك باستامالاردى ىسكە اسىرۋعا بەلسەندى اتسالىسىپ، حالىقتىڭ مۇددەسىن قورعاۋعا، وزەكتى الەۋمەتتىك ماسەلەلەردى شەشۋگە ناقتى ۇلەس قوسىپ كەلەدى»، – دەدى مۇرات نالقوجاۇلى.
ايماقتا مىڭعا جۋىق قوعامدىق ۇيىم تىركەلگەن، 2023-2026 جىلدارى مەملەكەتتىك الەۋمەتتىك تاپسىرىس اياسىندا 555 الەۋمەتتىك جوبا جۇزەگە استى. وبلىستىق، اۋداندىق اكىمدىكتەر جانىنداعى كەڭەستەر مەن كوميسسيالار قۇرامىندا 200-دەن استام ۇكىمەتتىك ەمەس ۇيىم وكىلى بار.
فورۋمدا «سامۇرىق» يننوۆاتسيالىق يدەيالاردى دامىتۋ ورتالىعى» قوعامدىق قورىنىڭ ديرەكتورى جاندوس تۇسماعامبەتوۆ، «اق بوساعا» ايەلدەر قوعامدىق بىرلەستىگىنىڭ توراعاسى زەينار تاجيەۆا، «ەل-اراي» قوعامدىق قورىنىڭ توراعاسى اسحات بايداۋلەتوۆ جانە «جاس تولقىن» ەرىكتىلەر جاساعىنىڭ جەتەكشىسى ءانۋار توقتامىسوۆ بايانداما جاساپ، ۇكىمەتتىك ەمەس ۇيىمداردىڭ الەۋەتىن ارتتىرۋعا قاتىستى ۇسىنىستارىن ورتاعا سالدى.
سونداي-اق ازاماتتىق قوعامنىڭ دامۋىنا ەلەۋلى ۇلەس قوسقان ازاماتتارعا كونستيتۋتسيانىڭ جاڭا رەداكتسياداعى ارنايى باسىلىمى تابىستالدى. وڭىردەگى بەلسەندى ۇكىمەتتىك ەمەس ۇيىمداردىڭ جەتەكشىلەرى وبلىس اكىمىنىڭ العىس حاتىمەن جانە ارنايى قارجىلاي سىياقى سەرتيفيكاتىمەن ماراپاتتالدى.
